Sápmi |

Sámenieidda boavji háliida máilmmimeašttirin spierroluistemis

Sámenieidda okta stuorra niehku ollašuvai go su Team Fintastic -boavji čeasahalai nu čábbát, ahte sii besset ovddastit Suoma spierroluistema máilmmimeašttirgilvvuin. Spierroluistemis joavku galgá luistet raddálagaid guđetguoimmiset veaigan.

Muodostelmaluistelija Lumi Hetta
Lumi Hetta lea spierroluistejeaddji Team Fintastic-joavkkus. Govva: Vesa Toppari / Yle

Ovccátluohkkálaš sámenieida sáhtášii šearrát okto davvenástin, muhto válljii báitit latnjalagaid 16 nástti ráiddus. Ovccátluohkkálaš Lumi Hetta lea spierroluistejeaddji Helssega Team Fintastic juniorjoavkkus.

Boavji luiste raddálagaid guđetguoimmiset veaigan.

– Mii luistet joavkkus. Buohkat fertejit leat seammaláganat, seamma áiggi. Gilvvuin viggat birget bures, čilge Hetta, mas spierroluistemis lea sáhka.

Lumi Hetta luistenjoavkku hárjehusat
Govva: Vesa Toppari / Yle

Niehku ollašuvai go besse máilmmimeašttirgilvvuide

Dál Team Fintastic lea hárjehallamin áŋgirit dasgo okta joavkku niehku lea aiddo ollašuvvan: Dát juniorjoavku beassá 16-17.3.2018 oassálastit Kroatias máilmmemeašttirgilvvuide.

Ovdal máilmmimeašttirgilvvuid ovddabealde leat Suoma meašttirgilvvut 3-4.32018. Dán jagi joavku lea vuoitán ovdamearkka dihte junioriid spierroluistema Tissot Neuchâtel -gilvvus Šveicas.

Fintastic-joavku hárjehallamin spierroluistema.
Govva: Vesa Toppari / Yle

Luomuide ii leat áigi, loaktá buoremusat jieŋa alde

15-jahkásaš Lumi Hetta lea luisten logi jagi. Jus áigu leat buoremus ja olahit olu, de luohpat maid ferte, dego luomuin soga luhtte Vuohčus.

Dálá dilis sii hárjehallet 5-6 geardde vahkus, eai dušše luiste baicce hárjehallet maiddái baleahta ja akrobatia.

– Astoáigi lea unnán. Dáppe leat skihpárat ja dáppe mun loavttán. Milloseamosit lean luistemin go gosnu eará sajis. Jus ii livčče dát luisten, de mii varra ásašeimmet Sámis, muitala Hetta.

Team Fintastic hárjehallamin.
Govva: Vesa Toppari / Yle

Ovttaláganat oktanaga, lihkká juohkehaččas vuhtto iežas persovnná

Go lea sáhka spierroluistemis, de das leat dihtolágan hástalusat ja gáibádusat. Ferte balddalágaid, seamma čalbmerávkaleamis bastit čeasahallat, jorggáhallat ja njuikedallat earáguin, muitala joavkku hárjeheaddji Milja Sarkkinen.

– Ferte leat valáštalli ja neavttárge dasgo sin prográmmat leat hui govalaččat. Gorudis gáibiduvvo olu ja musihkkarytma maid galgá dovdat ja čuovvut.

– Go guhttanuppelogis luistejit ovttafáro, de okta ii sáhte leat násti baicce buohkat fertejit leat seamma čeahpit, muitala Sarkkinen.

Valmentaja Milja Sarkkinen
Govva: Vesa Toppari / Yle

Barggánis ja movttet

Vaikko joavku galgá leat ovttalágan oktanaga, de lihkká juohkehaččas vuhtto iežas persovnná, muitala hárjeheaddji Milja Sarkkinen. Lumis son oaidná áŋgirvuođa ja dan man ilolaš ja sosiálalaš Lumi Hetta lea.

– Lumi lea hui barggán. Jus lea juoga mihttomearri, de son váldá áiggi, rahčá ja olaha dan maid áigu.

Dál go niehku máilmmimeašttirgilvvuide beassamis lea ollašuvván, de báhcá vel okta, mii leage oalle áigeguovdil juste dál.

– Dat, ahte luistemis beasašii gilvalit gitta olympiadásis, dadjá Hetta.

Geahča ášši otná Yle ođđasiin dii 16.45 Yle TV1-kanálas.

Varrasamosat: Sápmi

Váldoođđasat

Varrasamosat

Muualla Yle.fi:ssä