Kaikki talviolympialaisista!
Sápmi |

Sámenuorat bálkestuvvojedje Anára guovllu Facebook-joavkkus

Sámenuorat leat bálkestuvvon olggos Anára guovllu Facebook-joavkkus – moderáhtora mielas sámeságastallit sáhttet vuođđudit iežaset joavkku sámeságastallamii.

Moderáhtoriid almmuhus 31.1.2018
Moderáhtoriid almmuhus 31.1.2018 Govva: Šearbmagovva Inarin kansalaiskanava

Suoma sámenuorat searvvi várreságadoalli Ida-Maria Helander fuomášii dán vahku álggus, ahte son ii šat beasa ságastallat Suoma Sámi stuorimus sosiálamedia lávddis, Inarin kansalaiskanava -nammasaš Facebook-siiddus.

Ida-Maria Helander.
Govva: Mads Fægteborg

Helander čilge, ahte son lei bidjan jovkui gažadeami, mas jearai, ahte leago ortnegis, ahte joavkku okta moderáhtoriin gullá našunalisttalaš Suomen Sisu –searvái.

– Mun bidjen dohko dakkár jearahallama, mas jerren ahte mobat earát jurddašit: Leatgo olbmot seamma oaivilis, sierra oaivilis vai eai dieđe maid vástidit. Gažadeapmi ii mannan čađa goassige ja dan mun measta árvidinge, ja danin bidjenge dan maid mu seaidnái.

– Na dathan bálkestedje mu eret dan joavkkus. Eaige dat leat muitalan munnje manin ja in munge leat geargan inge veadján álgit jearahallat moderáhtoriin, ahte mii lea sivva.

Helander mielas orru amas, ahte Anár guovllu stuorimus ságastallanlávddis earáid kommeanttaid ja ságaid renske olmmoš, geas leat našunalisttalaš oktavuođat.

–Dien kanálas leamaš juo guhká dakkár ságastallamat, ahte doppe oažžu hállat baháid olbmuid birra ja eandalii sápmelaččaid birra. Ahte báikkis, gos leat muđuige váttisvuođat ságastallankultuvrras, lea dakkár moderáhtor.

Ida-Maria Helander sávvá, ahte joavkku lahtut oahpašedje neahttaetikeahta, ja ahte ságastallan šattašii čorgadut.

– Dathan livčče ideála, ahte doppe oččošii hállat juohke áššis earáiguin, jus beare olbmot máhtášedje láhttet, muhto go eai máhte. Dat eai ádde, ahte mii lea neahttaetikeahtta ja manin mis lea dakkár. Ahte manin ii sáhte álgit hállat maid beare, ja ahte dat báhcet dohko ja earát maiddái lohket daid ságaid.

Sámeságastallan gildojuvvui

Inarin kansalaiskanava -joavkkus leat badjelaš 5 000 lahttu. Joavkku siiddus lohká, ahte doppe sáhttá almmuhit Anára guovllu dáhpáhusain, ovdanbuktit oaiviliiddis lávvaplánemis, investeremiin, vearuhusas ja máŋgga eará áššis, mii laktása Anárii.

Joavku lea biddjojuvvon moadde jagi dassái giddejuvvon joavkun ja das leat dál oktiibuot njeallje moderáhtora, geat čuvvot ságastallama eaktodáhtolaš bargun.

Näyttökuva Inarin kansalaiskavan etusivusta
Inarin kansalaiskanava toimii Facebookissa Govva: Näyttökuva Inarin kansalaiskavan etusivusta

Moderáhtorat nannejit, ahte sámefáttát leat leamaš dakkárat, ahte daid olbmot kommenterejit hui ollu ja ságastallan leamaš hui ivdnái.

– Mii leat duođaige gieldán “sámeságastallama” go dasa bohtet vaššiságat. Leat bidjan jovkui dakkár njuolggadusa, ahte buot ságastallamiid álggaheamit mannet moderáhtoriid bokte, ja dárbbu mielde eat divtte almmustahttit dakkáriid, mas diehtá juo, ahte ságastallan manná sámeáššiin riidaleapmái ja juobe sohkačilgehusaide, čilge Eemeli Franssi, guhte lea okta moderáhtoriin.

Ávžžuha vuođđudit iežaset joavkku sámeságastallama várás

– Muhtin olbmot, geat leat jámma doallán daid áššiid ovdan kanálas, leat álgán njihkut, go sin sátnefriijavuođa leat duolbman. Min dearvvuođat sidjiide leat, ahte sis leat seammalágan vejolašvuođat vuođđudit iežaset Facebook-joavkku, man namma lea vaikko “Anára sámeságastallan” ja joatkit ságaideaset doppe, joatká Franssi.

Inarin kansalaiskanava -joavkku moderáhtorat šiitet, ahte moderáhtoriid politihkalaš duogáš váikkuhivčče joavkku ságastallankultuvrii dahje dasa, geat joavkkus leat šluhttejuvvon olggos. Okta moderáhtoriin baicce árvala, ahte su leat dál oaguheamen.

– Dás moatti jándora siste moadde olbmo leat váldán iežaset bargun suovastit mu eret kanála moderáhtorin mu politihkalaš jurddašeami dihte, čállá Eemeli Franssi Yle Sápmái.

– Mis leat moderáhtoriid joavkkus máŋggalágan duogážat, ja politihkalaš jurddašeapmi ii leat easttan kanála moderáhtorin doibmii. Ovttas moderáhtoriiguin leat ságastallan dien máinnašuvvon ášši dihte. Moderáhtorat leat ovdalge ožžon baikka iežaset ala bellodahkii gullama dihte, čilge Eemeli Franssi.

Inarin kansalaiskanava -siiddus moderáhtorat leat bidjan ođđajagimánu loahpas dieđáhusa, mii guoská moderáhtoriid sajádaga.

Moderáhtoriid almmuhus 31.1.2018
Moderáhtoriid almmuhus 31.1.2018 Govva: Šearbmagovva Inarin kansalaiskanava

– Mis ii leat moderáhtorin makkárge bassi geatnegasvuohta dohkkehit oaguheami ja dán sivas leat almmá váruhusaid haga eastán joavkku, mii lea geahččalan oaguheami, kanálas. Okta lea šluhttejuvvon kanálas dan dihte, go son lea almmolaččat cielahan joavkku moderáhtora Twitteras, čállet joavkku moderáhtorat.

Joavkku čálašeamis dutkanbivdagat

Inarin kansalaiskanava lea beaggán davvisuopmelaš medias ivdnás ságastallanbáikin, gos sápmelaččaid birra čállet vaikko maid. Ovdamearkka dihte Lapin Kansa -aviissas čállojuvvui joavkku birra gieskat. Aviissa čálus čalmmustahtii dan, ahte ságastallamis sápmelaččat šaddet gierdat máŋggalágan kommeanttaid.

Joavkku ságain ja kommenteremis leat dahkan bolesii dutkanbivdagiid máŋgii. Maŋimuš dutkanbivdda lea dahkkojuvvon ođđajagimánus 2018. Boles ii muital, gii dutkanbivdaga duohkin lea, muhto nanne, ahte dakkár lea sidjiide dahkkon.

– Ođđajagimánus lea dahkkojuvvon okta dutkanbivdda. Bolesa leat dáhtton dutkat, leago ságastallan leamaš áššálaš ja sisttisdoallágo dat man nu rihkkosa dovdomearkkaid, dadjá Jari Vasenius Lappi bolesis Avvilis.

Vasenius ii sáhte vel dadjat, mo dutkanbivdagiin geavvá ja álggahuvvogo ášši dutkan viidásabbot bolesa beales.

– Dutkanbivdagat leat leamaš ovdalge. Sii leat bolesis láven dahkat ovddalgihtii barggu ja dákkár dáhpáhusain maid váldit oktavuođa joavkku moderáhtoriidda.

Maiddái ovttaveardásašvuođa doaimmahahkii lea almmuhuvvon

Inarin kansalaiskanava -joavkku ságastallamiid ja kommeanttaid dihte leat váldán oktavuođa maiddái Suoma ovttaveardásašvuođa doaimmahahkii.

– Ovttaveardásašvuođa áittardeaddjái válde oktavuođa vuosttas geardde Inarin kansalaiskanava čálašeamis sullii jahki dassái. Áittardeaddji ávžžuhii dalle váldit oktavuođa joavkku moderáhtoriidda.

Seamma oktavuođas ovttaveardásašvuođa áittardeaddji ávžžuhii váldit sidjiide oktavuođa ođđasit jus moderáhtoriid doaimmat eai leat doarvái.

– Ovttaveardásašvuođa áittardeaddjái válde ođđasit oktavuođa juovlamánus. Áššeolmmoš guorahallá, ahte deavdágo čálašeapmi, mii lea su dieđus, ovttaveardásašvuođalágas máinnašuvvon heađušteami dovdomearkkaid ja jus deavdá, de mo áššái galggašii reageret, dadjá ovttaveardásašvuođa doaimmahaga bajit dárkkisteaddji Aija Salo.

Salo joatká, ahte neahttaságastallamiin ja eará neahttabálvalusain moderáhtoriin lea guovddáš rolla heađušteami ja eará vealaheami eastimis ja dasa fuomášumi giddemis.

Čálli lea maiddái ieš Inarin kansalaiskanava -joavkku lahttu.

5.2.2018 dii 7:40 Bajilčállagis šluhttejuvvon divvojuvvon hábmái bálkestuvvon.

Varrasamosat: Sápmi

Váldoođđasat

Bivnnuhamosat

Varrasamosat

Muualla Yle.fi:ssä