Sápmi

Sámenuorat besse ráhkadit filmmaid maoriid oahpus – moatti beaivvis gárvánan filmmažiid beassá oaidnit Skábmagovain

Oriwa Hakaraia, Venla Portti ja Iia Keskitalo
Oriwa Hakaraia, Venla Portti ja Iia Keskitalo leat oassálastan nuoraid filbmabargobádjái Anáris. Govva: Sara Wesslin / Yle

Skábmagovat ordnii filbmabargobáji, masa oassálaste nuorat sihke Guovdageainnus, Avvilis, Anáris ja Ođđa-Selánddas.

Sámi ja Aotearoa nappo Ođđa-Selándda nuorat leat olles fárttain ráhkadeamen ovttas filmmaid, mat galget leat válbmasat jo ihttin lávvardaga.

Eamiálbmogiid filbmafestivála Skábmagovat lea ordnen nuoraide dáid beivviid filbmabargobáji, mas leat leamaš oassálastit Guovdageainnus, Avvilis, Anáris ja Ođđa-Selánddas.

Oriwa Hakaraia lea nuorra filbmadahkki Ođđa-Selánddas. Su mielas lea leamaš fiinnis searvat bargobádjái ovttas sámenuoraiguin.

– Go álggos bohten deike, in diehtán maid vuordit. Lea leamaš hui miellagiddevaš oaidnit buot daid máidnasiid, maid sii háliidit muitalit. Dál sis lea vejolašvuohta muitalit daid máidnasiid nugo sii ieža daid vásihit.

Hakaraia mielas lea dehálaš, ahte eamiálbmogat besset ieža muitalit iežaset máidnasiid.

– Go mii geahččat min eamiálbmotmáidnasiid, de doppe leat sihke jallas ja fiinna máidnasat. Mu mielas lea dehálaš, ahte mii ieža muitalit daid, ovdalgo giige eará muitala daid min beales.

"Nuoraid filbmabajásgeassin lea dehálaš"

Nuorat leat dáid beivviid ráhkadan filmmaid Through Our Lense -nammasaš bargobájis.

Internašunála Sámi Filbmainstituhta Sunna Nousuniemi rámiida bargobáji, man Maoriland-filbmafestivála lea álggahan.

– Sii mátkkoštit miehtá máilmmi iešguđet eamiálbmotservodagain ja ráhkadit filmmaid guovtti beaivvis. Lea somá, mo sii juogadit dan iežaset čehppodaga ja filbmendáiddu. Mu mielas livččii somá, ahte miige barggašeimmet eanet dan dáppe Sámis.

– Lea leamaš hui somá oaidnit, mo sii geavahit iežaset maorigiela, lávlagiid ja buressivdnádusrituálaid oassin dáiddalaš barggus. Dat lea hui buorre min nuoraide oaidnit, mo maorit geavahit dan sin iežaset vuoiŋŋalašvuođa oassin dáidagis.

Sunna Nousuniemi
Sunna Nousuniemi Internašunála Sámi Filbmainstituhtas. Govva: Sara Wesslin / Yle

Nousuniemi illudage ovttasbarggus ja das, ahte nuorat besset juogadit iežaset kultuvrraid ja suohtastallat.

– Lea hui somá, ahte Internašunála Sámi Filbmainstituhtta ja Skábmagovat leat álgán ovttasbargat Maoriland-filbmafestiválain. Maorilanddas nuoraid filbmabajásgeassin lea hui dehálaš rollas, ja mu mielas lea hui mávssolaš, ahte mii addit min mánáide ja nuoraide vejolašvuođa vásihit, ahte sis maiddái gávdnojit buorit muitalusat ja ahte min ruovttuguovlu heive filbmabargguide.

Oriwa Hakaraia Venla Portti Iia Keskitalo
Oriwa Hakaraia váldime gova Venla Porttis ja Iia Keskitalos. Govva: Sara Wesslin / Yle

Avvillaš Venla Portti ja Iia Keskitalo leaba maid searvan bargobádjái. Soai muitaleaba, ahte álggus gal eaba lean nu beroštuvvan filmmaid ráhkadeamis.

– Dál, go dása lea beassan sisa, dát álgá olles áigge leat eanet miellagiddevaš, muitala Portti.

Dál leabage movttáskan filmmaid ráhkadeamis. Sudno vuosttas filmma vuosttašeahketge lahkona fárttain.

– Leahan dat veháš gelddolaš, go earátge besset oaidnit min filmma, muitala Iia Keskitalo.

Nuoraid filbmabargobájis ráhkaduvvon filmmat čájehuvvojit sámekulturguovddáš Sajosis lávvardaga 25.1. diibmu 15.00–17.30 ja maŋŋelis maiddái Maoriland filbmafestiválas Aoteoras njukčamánus.

Varrasamosat

Muualla Yle.fi:ssä