Sápmi |

Sámeoahpahus oažžu iežas digitálalašfierpmádaga nehttii – "Dán veahki oahpaheaddjit leat juo guhkkit áigge dárbbašan"

Sámeoahpahusa neahttaalmmustahttinbiras rahppojuvvo golggotmánu 1. beaivve

Unni Länsman
Sámi oahpahusguovddáža prošeaktajođiheaddji Unni Länsman muitala, ahte sámegielat oahpaheaddjit ja eará oahpahussuorggi olbmot leat juo guhká vuordán dákkár neahttabáikki. Govva: Vesa Toppari / Yle

Sámi oahpahusguovddáža Árktalaš pedagogihka -fitnu ja sámeoahpahusa oahpaheaddjit almmustahttet golggotmánu álggus Sámeoahpahusa digitálalaš oahppanfierpmádaga neahtas.

Digitálalaš fierpmádagas sámeoahpahusa áššedovdit sáhttet čatnat oktavuođaid ja almmustahttit nu vuođđooahpahusa, logahaga go maiddái ámmátlaš skuvlejumiide guoski digitálalaš oahppomateriálaid. Sámi oahpahusguovddáža prošeaktajođiheaddji Unni Länsman muitala, ahte sámegielat oahpaheaddjit ja eará oahpahussuorggi olbmot leat juo guhká vuordán dákkár neahttabáikki.

– Sámeoahpahusas váilot oahppomateriálat buot sámegielain. Oahpaheaddjit dávjá ieža ráhččet buvttadit dáid materiálaid. Dát ođđa neahttabiras galgá leat dakkár báiki, gos oahpaheaddjit besset gaskaneaset juogadit dáid sin iežaset buvttadan oahpahusmateriálaid, čilge Länsman.

Digitálalašmateriálaid almmustahttinbáiki dahká vejolažžan dan, ahte sámeoahpahusa áššedovdit sáhttet juohkit doppe ovdamearkka dihtii filmmaid, oahppospealuid ja govaid sihke davvi-, anáraš- ja nuortalašgillii. Neahttabáikkis lea vejolaš almmustahttit maiddái suomagielat oahppomateriála, man sáhttá ávkkástallat ja geavahit vierisgielagiid sámegiela oahpahusas.

Digitálalaš oahppanfierpmádaga ulbmilin lea doaibmat vuođđun sámeoahpahusa doibmiid ovttasbargoreaidun ja oktasaš digitálalaš materiálabáŋkun.

Ođđa neahttafierpmádahkii vurdet olu geavaheaddjiid.

– Mu vuordámuš lea, ahte sámeoahpaheaddjit ožžot ovtta báikki, gos besset ságastallat ja juogadit materiálaid. Dát lea hui gelddolaš ja mun vuorddán, ahte sii ožžot dan veahki, maid sámeoahpahus lea jo guhkkit áigge dárbbašan, dadjá Länsman.

Saamelaisopetuksen digioppimisverkosto
Sámeoahpahusa neahttaalmmustahttinbiras rahppojuvvo golggotmánu 1. beaivve Govva: Sámi oahpahusguovddáš

Giellaberošteaddjit maid besset searvat

Neahttafierpmádaga ulbmilin lea earret eará doarjut vuođđooahpahusa oahppoplána ollašuvvama ja maiddái ovttasbarggu bokte álkidahttit sámeoahpahusa hástaleaddji oahppomateriáladili. Oahppomateriálaid juohkima lassin oassebealit sáhttet neahttabáikkis ságastallat sámeoahpahussii guoskevaš bargovugiin, vásáhusain ja ođđa jurdagiin.

Almmustahttinbáiki lea oaivvilduvvon eandalitge sámeoahpahusa oahpaheddjiide, oahppomateriálabargiide ja sámeoahpahusa áššedovdiide.

– Dát sáhttá leat maiddái min giellameašttiriidda dakkár arena, gos sii sáhttet ovddidit sámeoahpahusa. Dieđus dábálaš olmmoš, guhte ii bargga oahpahusas, muhto háliida muđuid veahkehit dan materiálabarggus, sáhttá searvat. Ulbmil lea goit, ahte dát lea sámeoahpahusa ja oahppomateriálabargiid arena, gos sii sáhtte juogadit dieđu ja dáiddu, deattuha Länsman.

Neahttabáikki ráhkadeamis leamašan mielde njealje ovddidanoahpaheaddji buot sámegielddain.

Sámeoahpahusa neahttaalmmustahttinbiras rahppojuvvo golggotmánu 1. beaivve.

Sámeoahpahusa digitálalaš fierpmádat -fidnu lea Sámi oahpahusguovddáža ja Lappi universitehta oktasaš ovddidanfidnu, man ruhtadit Eurohpa sosiálaruhtarádju, Sámediggi ja maiddái Eanodaga, Anára, Ohcejoga ja Soađegili gielddat.

Varrasamosat: Sápmi

Váldoođđasat

Varrasamosat

Muualla Yle.fi:ssä