Sápmi |

Sameradion & SVT Sápmi: Ruoŧa Sámediggi šiitá moaitámušaid sámi bázahusaid hávdádan proseassas

Ruoŧa Sámedikki stivrra ságadoalli Per Olof Nutti oaivvilda, ahte Sámedikki kulturlávdegoddi ja etihkalaš ráđđi leat bargan buori barggu dološ dáktebázahusaid hávdádan ášši olis.

Per Olof Nutti
Ruoŧa Sámedikki stivrra ságadoalli Per Olof Nutti mielde Sámediggi lea beassán oasálastit hávdádan prosessii. Govva: Carl-Johan Utsi / Sameradion & SVT Sápmi

Ruoŧa Sámedikki stivrra ságadoalli Per Olof Nutti šiitá moaitámušaid ja cuiggodemiid sámi bázahusaid hávdádan proseassa oktavuođas, muitala Sameradion & SVT Sápmi. Nutti mielde Sámedikki kulturlávdegoddi ja etihkalaš ráđđi leat dahkan doarvái buori barggu ášši olis.

Sameradion & SVT Sápmi lea árat dán vahkkus muitalan, ahte 12 sápmelačča moite garrasit dološ sámi dáktebázahusaid hávdádanvuogi Likšus Ruoŧas. Mannan vahkku lávvordaga Likšus Västerbottenis hávdáduvvojedje 25 váinni oaiveskálžžut ja dáktebázahusat.

Stuorámus moaitta 12 sápmelačča joavkkus lei dat, ahte hávdádan proseassas eai lean váldán doarvái vuhtii sámi oainnu ja dat čađahuvvui kolonialisttalaš vuogi mielde. Sámit moite maiddái dan, ahte eanet sápmelaččat livčče galgan beassat oasálastit plánen bargui. Maiddái seremoniija lei galgat dollojuvvot ja dulkojuvvot sámegillii. Oktan moaittagin lei dat, ahte Ruoŧa ráđđehus dat livččii galgan máksit buot hávdádeapmái gullevaš goluid. Dál hávdádeapmi čađahuvvui sierra prošeaktabargun.

Sii geat moite hávdádanproseassa, ledje earret eará artista ja aktivista Sara Ajnnak, Ruoŧa Sámedikki duohtavuođakommišuvnna bargojoavkku láhttu Marie Persson Njaita, sámepolitihkkár Marie-Louise Boman Landsförbundet Svenska Samer bellodagas ja filbmabargi Oskar Östergren Njaita.

”Sámit leamašan mielde ja bargan buori barggu”

Ruoŧa Sámedikkis lea ovddasvástádus bargat sámi bázahusaid hávdádan áššiin. Ruoŧa Sámedikki stivrra ságadoalli Per Olof Nutti oaivvilda, ahte Sámedikki kulturlávdegoddi ja etihkalaš ráđđi leat bargan doarvái bures dáinna áššiin.

– Dás gal leat Sámedikki kulturlávdegoddi ja etihkalaš ráđđi dahkan buori barggu ja leat oassálastán dán bargui ja leat leamašan mielde. Dat geat moitet ,ahte sámit eai lea leamašan mielde proseassas, dat ii doala deaivása, lohká Per Olof Nutti.

Nutti mielde Sámediggi ii nagot dahkat dakkár bargguid, go sis eai leat ekonomalaš návccat dasa ja danne ovttasbargu leage buorre. Nutti dadjá Sameradion & SVT Sápmái, ahte Ruoŧa stáhta boahtá ásahit duohtavuođakommišuvnna ja doppe lea vejolaš ovdanbuktit dakkár jearaldagaid ja áššiid.

Varrasamosat: Sápmi

Váldoođđasat

Varrasamosat

Muualla Yle.fi:ssä