Sápmi |

Sameradion & SVT Sápmi: Sámeaktivisttaid joavku kritisere dološ dáktebázahusaid hávdádanvuogi Ruoŧa Likšus

Sámeaktivisttaid mielas hávdádeamis eai lean váldán doarvái vuhtii sámi oainnu ja dat čađahuvvui kolonialisttalaš vuogi mielde.

Likšu oaiveskálžžut hávdádeapmi 10.8.2019
Lagabui 500 olbmo ledje čoahkkanan 10.8.2019 Likšui hávdádit 25 váinni oaiveskálžžuid ja dáktebázahusaid. Govva: Johan Palomäki

Sámeaktivisttaid joavku kritisere dološ dáktebázahusaid hávdádanvuogi Ruoŧa Likšus, muitala Sameradion & SVT Sápmi. Mannan vahkku lávvordaga Likšus Västerbottenis hávdáduvvojedje 25 váinni oaiveskálžžut ja dáktebázahusat Gammplatsena hávdádansadjái.

Sámeaktivisttaid mielas hávdádeamis eai lean váldán doarvái vuhtii sámi oainnu ja dat čađahuvvuige kolonialisttalaš vuogi mielde, oaivvildit sápmelaččat.

Preassadieđáhusastis 12 sápmelačča joavku buktá ovdan beahttašuvvama Likšu gildii, go dat ii leat váldán eará sámi guovlluid mielde hávdádanprosessii. Dieđáhusa leat vuolláičállán earret eará artista Sara Ajnnak, Ruoŧa sámedikke áirras Marie Persson Njaita, politihkar Marie-Louise Boman Landsförbundet Svenska Samer -bellodagas ja filbmadahkki Oskar Östergren Njaita.

Likšu gielda šiitá moaitagiid

Vuolláičálliid mielas stáhta dat livččii galgan ollásit máksit dáktebázahusaid máhcahan- ja hávdádanproseassa. Dál dáktebázahusat hávdáduvvojedje sierra prošeavtta olis.

Vuolláičállit oaivvildit maiddái, ahte eará guovlluid sápmelaččat livčče galgan beassat oasálastit máhcahan- ja hávdádanbargui. Sámeaktivisttaid joavku kritisere maiddái dan, ahte Likšu hávdádan dilálašvuohta ii lean ordnejuvvon sámegillii iige báikki alde lean dulka.

Likšu gielda fas oaivvilda, ahte buot lea mannan njuolggadusaid mielde. Likšu gieldda prošeaktahoavda Adriana Aurelius dadjá Sameradion & SVT Sápmái, ahte gielda lea váldán sámiid mielde viidát hávdádanprosessii eaige leat bargan maidege boastut.

Varrasamosat: Sápmi

Váldoođđasat

Varrasamosat

Muualla Yle.fi:ssä