Sápmi |

Sámesearvvit gáibidit sámediggeválggaid sirdima ja sámediggelága ođasteami – sámenuorat čogge servviid oktii

Suoma Sámi Nuorat -searvi lea čohkken sámeservviid vuolláičállit cealkámuša, man leat sádden earet eará bellodagaid njunnošiidda.

Suomen saamelaisnuoret: Ánte Veijola, Áile-Risten Holmberg, Juhán-Tuommá Magga, Ida-Maria Helander, Teija Kaartokallio, Máren-Elle Länsman, Enni Similä, Reetta Poikela, Petra Laiti, Karen-Anni Hetta, Anne Olli, Milla Pulska ja Ánne-Sofe Niittyvuopio
SSN jahkečoahkkima 2019 oasseváldit Ánte Veijola, Áile-Risten Holmberg, Juhán-Tuommá Magga, Ida-Maria Helander, Teija Kaartokallio, Máren-Elle Länsman, Enni Similä, Reetta Poikela, Petra Laiti, Karen-Anni Hetta, Anne Olli, Milla Pulska ja Ánne-Sofe Niittyvuopio. Govva: Suoma Sámi Nuorat / Suomen saamelaisnuoret

Suoma Sámi Nuorat -searvi lea čohkken sámeservviid vuolláičállit cealkámuša, mainna gáibidit earet eará Suoma sámediggeválggaid sirdima.

Reivves evttohit, ahte jođánis lági mielde ásahuvvo láhka, mainna jotket dálá Sámedikki doaibmabaji 1–1,5 jagiin ja mainna sirdet sámediggeválggaid nu, ahte dat dollojuvvojit áramustá čakčat 2020. Dasa lassin cealkámušas evttohit, ahte Suoma stáhta ovttasbarggus sámeservodagain válmmaštallá ja dohkkeha sámediggelága 3 paragráfa nappo sápmelašmeroštallama nu, ahte dat sihkkarastá sápmelaččaid iešmearridanrievtti ja sápmelaččaid seailuma etnalaš joavkun nugo Ovttastuvvan Našuvnnaid olmmošriektekomitea lea gáibidan. Reivves gáibidit maiddái, ahte čuovvovaš sámediggeválggain čuvvot ođasmahtton sápmelašmeroštallama.

Reivve leat vuolláičállán Suoma Sámi Nuoraid lassin Sámiráđđi, Nuortalaččaid giličoahkkin, Anára Sámi Searvi, Oulu Sámit -searvi, Vuohču Sámiid Searvi, Sámi Siida -searvi ja kultursearvi Aanaar sämmiliih. Anarašah-searvi ii leat vuolláičállán reivve, nuugo álgoálgosaš dieđáhusas čuoččui.

Cealkámuš lea sáddejuvvon ráđđehusgulaskuddi Antti Rinnei, ráđđehusráđđádallamiid Riektestáhta ovdánahttin -bargojoavkku ságadoalli Dan Koivulaaksoi ja bellodagaid ságadolliide. Reive lea biddjon diehtun maiddái mediaide ja Sámediggái.

Maiddái Sámedikki lea oaivvildan árabut, ahte sámediggeválggaid galggašii sirdit unnimustá jagiin, vai sámediggelága sápmelašmeroštallama gearggašedje rievdadit ovdal čuovvovaš válggaid.

Suoma Sámi Nuoraid várreságadoalli Enni Similä muitala, ahte Suoma Sámi Nuorat oidnet sámediggeválggaid sirdima ja Ovttastuvvan Našuvnnaid olmmošvuoigatvuođakomitea oainnuid gudnejahttima dehálažžan, ja dan dihte leat mearridan dákkár cealkámuša čállit.

– Mii dieđusge háliidit, ahte dat guldalivčče min doppe Helssegis ja válddáše maiddái min oainnuid vuhtii, ja maiddái gudnejahtáše dan mearrádusa, mii lea boahtán Ovttastuvvan Našuvnnain, muitala Similä.

Yle Sápmi ii leat fáhten Antti Rinne kommenteret ášši.

Varrasamosat: Sápmi

Váldoođđasat

Varrasamosat

Muualla Yle.fi:ssä