Koe uusi yle.fi
Sápmi |

Sámevarra - Sameblod Suoma filbmateáhteriidda čakčat

Mannan jagi almmustahttojuvvon Sameblod-filbma boahtá dán čavčča Suoma filbmateáhteriidda.

sami blood, sameblod, sámevarra
Govva: Sameblod - Sami Blood Facebook

Sameblod-filbma boahtá filbmateáhteriidda čakčat Suomas. Filmma vuosttašeahket lea Suomas čakčamánu 29. beaivve.

Filbma lea almmustahttojuvvon mannan jagi, muhto dat ii leat ovdal čájehuvvon Suoma filbmateáhterain. Sameblod boahtá prográmmafálaldahkii Cinema Mondo -filbmafitnodaga bokte.

Filmma lea bagadallan Amanda Kernell.

Sameblod lea ožžon bálkkašumiid, ovdamearkka dihte árvvus atnon Dragon Award Best Nordic Film -bálkkašumi Göteborga filbmafestiválain.

Sámevarra muitala 1930-logu sámiid váttis eallindilis. Sámenieida Elle Márdjá vázzá sámeskuvlla ovttas oappáinis ja fargga galggašii álggahit bearraša boazodoalu birra fuolahit. Nieida mearrida son ii šat hálit leahkit sápmelaš ja fárreges Uppsalai. Uppsalas dahke garra nállebiologalaš dutkamušaid sápmelaččaide.

Filmmas hállojuvvo sihke sáme- ja ruoŧagiela. Dat tekstejuvvo suoma- ja ruoŧagillii.

Suopmelaččat galggaše oaidnit

Filmma fidnemis Supmii leat ráđđadallan giđđat. Dalle lei sáhka das, man dehálaš livčče dan oažžut maiddái suopmelaččaide oaidninláhkái.

Internašunála Sámi filbmainstituhta jođiheaddji Anne Lajla Utsi oaivvildii, ahte suopmelaččat galggaše oaidnit dán filmma.

– Juste dán filmma, dan assimilerenpolitihka birra. Ja mainna lágiin Amanda Kernell lea muitalan, son lea nu čehpet dan muitalan dakkár persovnnalaš dásis.

– Mun lean čuvvon dan filmma miehtá máilmmi, ja oaidnán mo olbmot váldet vuostá dan. Dat lea universála fáddá dat gullevašvuohta ja identitehta. Ja mun jáhkán earenoamážit dáppe davviriikkain dat lea hui dehálaš, ahte majoritehta servodagas gehččet dán filmma, das lea hui stuorra mearkkašupmi.

Varrasamosat: Sápmi

Váldoođđasat

Bivnnuhamosat

Varrasamosat

Muualla Yle.fi:ssä