Sápmi |

Sámi- ja románadáiddárat ja -kulturbargit čoahkkanedje Anárii – plánain lea oktasaš kulturdáhpáhus

Nuppe háve ordnejuvvon Gula mu – Hunnela maan -kulturforum čohkkii 12 bovdejuvvon sáme- ja románadáiddára oktii Anárii. Konkrehta plánan lea ordnet oktasaš kulturdáhpáhusa vejolaččat jo boahtte jagi.

Milja Guttorm Sajoksen Solju-salissa Inarissa.
Gávpotsámekultuvrra leanadáiddár Milja Guttorm muitala, ahte jurddan lea, ahte kulturdáhpáhusaid báikkit livčče sihke Sámis ja Lulli-Suomas. Govva: Inger-Elle Suoninen / Yle

Anáris lea dán vahkus ordnejuvvon Gula mu – Hunnela maan -kulturforum. Dáhpáhusas leat gieđahallan dan, mot dáiddáriid ja dáidaga áššit leat Suomas. Dáhpáhusas ovdánedje konkrehta áššiid guvlui ja mearridedje ordnet kulturdáhpáhusa ovttas romána- ja sámeservviiguin.

– Sávvamis juo boahtte jagi bealde, muhto mii geahččat, ahte mot dat áiggi dáfus lihkostuvvá, muitala gávpotsámekultuvrra leanadáiddár Milja Guttorm.

Dáhpáhusa ordnejedje Dáidaga ovddidanguovddáš, Sámediggi ja Romána kulturguovddáš Tseeruno ry. Mielde ledje 12 dáiddára, geaid ledje bovden báikki ala.

Mertsi Lindgren Tseeruno-románakulturguovddážis dadjá, ahte go sii leat oahpásmuvvan ja fuomášan goabbáge veahádagas seammasullasašvuođaid, de sii oidnet, ahte sis lea oktasaš agenda ovddidit dáidaga ja kultuvrra, čohkket fámuid oktii ja vuolgit das johtui.

– Orru leame hui fiinnis, ahte mii gávnnaime ovtta mihttomeari, man guvlui johtit, nappo dákkár oktasaš kulturdáhpáhus. Leago dat de veahá viiddiduvvon Gula mu – Hunnela maan -dáhpáhus vai mii, muhto juohke dáhpáhusas háliidit dakkára álgit buvttadit. Gal dat buktá munnje ilu, muitala Lindgren.

Leanadáiddár Milja Guttorm muitala, ahte jurddan lea lágidit dáhpáhusa guovtti báikkis.

– Mis lea leamašan jurddan, ahte jus okta báiki livččii dáppe Sámis ja nubbi doppe Mátta-Suomas ja doppe boahtá leat nugo musihkka dáhpáhusat, konsearta ja dalle mánáide ja nuoraide dihtolágan bargobádji ja dalle eará dakkár kultuvrralaš sisdoallu.

Mertsi Lindgren Sajoksen Solju-salissa Inarissa.
Mertsi Lindgren románakulturguovddáš Tseeruno Rs:s muitala, lea ilus go plánain lea ordnet kulturdáhpáhusa. Govva: Inger-Elle Suoninen / Yle

Háliidit ahte sámi ja románadáiddárat gávnnadit

Gula mu – Hunnela maan -dáhpáhusas sihke sámi- ja románadáiddárat besset ráhkadit oktavuođaid nubbi nubbái. Lindgren mielas lea dehálaš, ahte dáiddárat besset ságastallat sullasašvuođain sajis, gos lea luohttámuš ja dorvvolaš hupmat.

Moadde beaivvi bisti deaivvadeamis kulturforumii oassálastán dáiddáriin ja kulturbargiin ledje oktasaš rabas mikrofovdnabottut. Lindgren muitala, ahte oktavuođaid ii sáhte bágget, muhto galgá ordnet saji, gos olbmot sáhttet daid ráhkadit.

– Dieđus okta metoda lea dat, ahte mii čohkkát vulos dan várás, ahte ráhkadit ovttas musihkkabihtá dahje dáidaga. Muhto mun liikon dán vuohkái, ahte mii leat ovttas ja oaidnit, mot áššit ovdánit, lohká Lindgren.

Gula mu – Hunnela maan -kulturforum lágiduvvui dál Anáris nubbe háve. Vuosttaš kulturforum lágiduvvui Anáris skábmamánus 2020.

Beaivvi ságaid ja Yle Ođđasiid Sámis sáhtát maid guldalit Yle Areenas.

Varrasamosat: Sápmi

Váldoođđasat

Varrasamosat

Muualla Yle.fi:ssä