Sápmi |

Sámi álbmotbeaivve sáddejuvvo davviriikalaš neahttastreama – govvadáiddárat gilvvohallet, geas lea vuohkkasamos dáiddaduodji

Govvadáiddárat Sunna Kitti, Máijá Rasmus ja Juvvá Pittja málejit sámi álbmotbeaivái laktáseaddji gova, ja geahččiin lea vejolašvuohta vuoitit iežas jiellaha gova.

Sámi álbmotbeaivi
Sámi álbmotbeaivvi livesáddagis leat sámemusihkka, dáiddárat ja ráhkisvuohtaságat. Govva: Yle

Yle Sápmi, NRK Sápmi ja Ruoŧa sámegielat rádio- ja tv-doaimmahusat sáddejit ovttas sámi álbmotbeaivve davviriikalaš neahttavideosáddaga nappo streama.

Sátta bistá sulaid 90 minuhta ja das leat mielde dáiddárat ja guossit miehtá Sámi Suomas, Ruoŧas ja Norggas.

Sáddagis ráidogovvadahkki Sunna Kitti, govvadáiddár Máijá Rasmus ja govvadáiddár ja girječálli Juvvá Pittja málejit sámi álbmotbeaivái laktáseaddji gova, ja geahččit besset jienastit, gean govva lea sin mielas vuohkkasamos. Neahttasáddaga loahpas guđege dáiddára jienasteaddjiid gaskkas vuorbádit govaid vuoitiid.

Jienasteapmi dáhpáhuvvá sosiála media bokte sáddemiin NRK Sámi Instagram-kontui dieđu fáddágilkoriin #ylesunna, #svtjuvva dahje #nrkmaija dan mielde guđemuš dáiddára duoji atná vuohkkasamosin. Jienastit sáhttá maiddái e-poasttain čujuhussii samideska@nrk.no.

Geahča vulobealde videoid govvadáiddáriin.

Video: median oletuskuva, musta laatikko
Sunna Kitti liiko ráhkadit ráidogovaid. Son liiko muitalit máidnasa govaid bokte. Video: Yle Areena, govva: Mika Puska

Video: Juvvá Pittja. Govvadáiddár.
Juvvá Pittja muitala ivnniiguin dovdduidis ja jurdagiiddis birra. Video: SVT

Video: Máijjá Rasmus, govvadáiddár
Máijá Rasmus liiko málet ja ráhkadit digitála dáidaga. Video: Yle Areena, govva: NRK

Guossit juhket ráhkisvuođamuitalusaideaset

Sámi álbmotbeaivve neahttasáddaga temán leat searvvadahttin ja ráhkisvuohta.

Ráhkisvuođa birra boahtá sáhka earret eará Viktor Blindain ja Ida Persson Labbain. Soai leaba Ruoŧas hui dovddus bárra, go searvvaiga moadde jagi áigi Ruoŧas riikkaviidosaš tv-prográmmii, mas čuvvo nuorra vánhemiid eallima.

Viktor Blind ja Ida Persson Labba
Viktor Blindain ja Ida Persson Labbain šaddá sáhka ráhkisvuođas. Govva: SR Sámeradio

Blind ja Persson Labba leaba rahpasit čájehan maiddái sudno ráhkisvuođa. Maid sudno ráhkkaneami heajaide ja náitaleami besse olles Ruoŧas čuovvut buoremus sáddenáiggi tv:as.

Ráhkisvuođas lea sáhka maid nuppiin bárain. Anárlaš Tauno Ljetoff ja Laura Olsen leaba nuorrabárra, geat rahčaba unnitlogu gielaid ovdii árgaeallimis. Ljetoff lea ollesolmmožin oahpahallan máttuidis giela nappo nuortalašgiela, ja dál son lea nuortalašgiela oahpaheaddjin Anáris. Su moarsi Olsen lea vuos oahpahallan davvisámegiela, ja dál son lea oahppamin irggis giela.

Earálágan ráhkisvuođas muitala fas thamilanisson Tharanga Rajah. Son lea ráhkásnuvvan Sápmái. Son lea čájehan ráhkisvuođas dainna, ahte lea čállán su vuosttas romána Sámi birra. Romána guovddáš persovnnain leat sámi namat ja dáhpáhusat leat Sámis. Rajah lea rámiidan dan, go sámit leat váldán su nu bures vuostá.

Searvvadahttin oidno ovdamearkka dihte hástalusaid bokte. Streamas beassá oahppat, mo galgá irggástallat dahjege flirtet sámegillii ja gii lea jođáneamos nuollat goikkehiid. Neahttasáddagis leat maid ollu sámegielat guossit, go measta visot guossit, geat leat searvamin sáddagii hállet mannu Suomas, Ruoŧas dahje Norggas hállojuvvon sámegiela.

Streama musihkkafálaldat lea válljejuvvon nu, ahte fállun lea máŋggalágan musihkka nuortalašgielat rockmusihkas gitta árbevirolaš luohttái. Riddu Riđđu dáiddalaš jođiheaddji Sandra Márjá West rohttesta luođi ja Tero Harju ja Teemu Titola TPA2000-joavku lávlesteaba iežaska nuortalašgielat bihtá "Iʹlbbes åummai diõtt".

Lágideaddjit Romssas, Johkamohkis ja Anáris

Davviriikalaš neahttasáddaga lágidit ovttasráđiid sámiid sáddehagat NRK Sápmi, Yle Sápmi ja Ruoŧas SVT Sápmi ja SR Sámeradio. Sáddaga sáddenbáikkit leat Romsa, Johkamohkki ja Anár ja neahttasáddaga láidestit Maret Biret Sara Oskal, Ivan Aleksander Buljo, Xia Torikka, Jon-Erik Näkkäläjärvi ja Anna-Karin Niia.

Álbmotbeaivvi neahttasátta álgá 6.2.2019 Ruoŧa ja Norgga áigge diibmu 18.00 ja Suoma áigge diibmu 19.00. Sátta bistá Ruoŧas ja Norggas diibmu 19.30 rádjái ja Suomas diibmu 20.30.

Streama sáhttá čuovvut sámi álbmotbeaivve NRK Sámi, Yle Sámi ja Ruoŧa SVT Sámi ja SR Sámeradio neahttasiidduid bokte.

Ruoŧas sáddaga gávdná oddasat.se-neahttasiiddus ja svtplay.se/-neahtta-tv:s.

Norggas álbmotbeaivvi neahttasáddaga sáhttá geahččat NRK neahtta-tv:s.

Suomas neahttasáddaga sáhttá geahččat Suoma bealde Yle Areenas.

Boađe Sajosii čuovvut min livestreama diibmu 19.00 rájes.

Varrasamosat: Sápmi

Váldoođđasat

Varrasamosat

Muualla Yle.fi:ssä