Sápmi |

Sámi álbmotbeaivvi ávvudit miehtá Suoma – geahča dás gos dáhpáhuvvá!

Sámi álbmotbeaivi ávvuduvvo ihttin gaskavahkko 6. guovvamánu.

Sámi leavga
Sámileavga livarda otne leavgastákkuin miehtá Sámi. Govva: Yle Sápmi

Sámi álbmotbeaivvi gudnin ordnejuvvojit Suomas máŋggalágan dáhpáhusat ja ávvudoalut sihke Sámis ja maiddái sámeguovllu olggobealde. Yle Sápmi lea čohkken dieđuid sámi álbmotbeaivvi dáhpáhusain báikegottiid mielde.

Geahča dás gos dáhpáhuvvá ja beasat searvat ávvudemiide!

Anár

Anáris dáhpáhuvvá olu Sámi álbmotbeaivve. Beaivi álgá Sámemusea Siidda šiljus leavgga loktemiin diibmu 9.00. Sihke Siiddas ja Sámi kulturguovddáš Sajosis leat rabas uvssat. Sámedikki ságadoalli Tiina Sanila-Aikio rahpá ávvudeami Sajosis diibmu 10.00. Beaivvi áigge Sajosis leat earret eará lávlunbottut ja vejolašvuohta geahččat sámi filmmaid. Maiddái Sámedikki doaimmahagat ovdanbuktet iežaset doaimmaid.

Anára searvegoddeviesus beassá herkkostallat diibmu 10.30 rájes, go SámiSoster-searvi fállá biepmu ja gáhkuid. Biepmu maŋŋel de lea vejolašvuohta girkostallat. Dál jo árbevierrun šaddan bismmameassu álgá Anára girkus diibmu 13.00.

Siida Sámemuseas lea vejolaš fitnat geahččamin duojár Biret-Ánne Lehtola duodječoakkáldaga, mii skeŋkejuvvo Sámemuseai Sámi álbmotbeaivve.

Nuoraidráđđi ja Anára searvegoddi ordnejit sámegielat nuoraid eahkeda Vinttis diibmu 15-18.

Eanodat, Heahttá

Eanodagas Sámi álbmotbeaivvi beassá ávvudit Luovatupas biđđosiin ja gáhkuin diibmu 11–13. Duottar-Lappi luondduguovddážis čájehuvvo Maj Lis Skaltje filbma Joik–Juoigan diibmu 12.30 rájes. Filmma maŋŋá lea vejolaš gullat Johtti Sápmelaččat -searvvi doaimma birra.

Saamenpuku eli gákti kertoo kantajansa kotiseudusta ja sukujuurista, ja osa gáktista on monesti suvussa kulkevaa perintöä. Anne Ollin saamenpuvun vyö on äidin vanha.
Govva: Maija-Liisa Juntti / Yle

Ohcejohka

Ohcejogas álbmotbeaivi ávvuduvvo Niillas Holmberg ja Wimme ja Rinne konsearttain. Konsearta ordnejuvvo Ohcejohnjálmmi skuvllas diibmu 19.00 rájes. Ovdal konseartta lea vejolaš maiddái boradit ja gáfestallat.

Ohcejoga gielddadálus lágiduvvo rabas uvssaid beaivi diibmu 12.00–16.00. Gielddahoavda ja hálddahushoavddat bovdejit olbmuid ságastallat gieldda áigeguovdilis áššiin dego ealáhusaid ovdánahttimis, lávvaáššiin ja skuvlaviesuid huksemis.

Duorastaga ja bearjadaga Davvinásti-ealligovvateáhteris leat oaidnimis sihke sáme- ja eamiálbmotfilmmat.

Roavenjárga

Sámi álbmotbeaivi oidno dán jagi Roavenjárggas earenomáš bures, go dál lea vuosttaš geardi go álbmotbeaivi ávvuduvvo buot gávpoga skuvllain ja mánáidgárddiin. Roavenjárgga skuvlenlávdegoddi dat mearridii mannan giđa, ahte sámi álbmotbeaivi galgá čalmmustahttojuvvot skuvllain ja mánaidgárddiin.

Roavenjárgga Mii-sámesearvi ordne álbmotbeaidoaluid MLL bearašdoaibmaguovddážis dmu 17.00–19.00. Ávvudoaluin lea fállun biergomálli ja gáhkkogáfet ja Fierranjot Kirste, Kirste Paltto máinnasta. Beaivvi áigge maiddái Lappi universitehta ordne skuvlakino Arktikumas.

Lappi universitehtas fas lágiduvvo diibmu 14 Mini-Skábmagovat, gos lea vejolaš oaidnit Lada Suomenrinne oanehisfilbma Árbi, Sara Margrethe Oskala bagadan Beaivvi nieida ja maiddái Jon Blåhedin filbma Maj Doris.

Oulu

Oulu dáiddamuseas lágiduvvo sámi álbmotbeaivve rabas seminára sápmelaččaid sajádagas eamiálbmogin Suomas. Semináras dollet sáhkavuoruid nu boazodoalu, duoji, dáidaga go maiddái politihka geahččanguovllus.

Eahkes diibmu 21.00 lea vejolaš gullat nuortalaš Suõmmkar-musihkkajoavkku konseartta Tuba Food & Lounch:is.

Jyväskylä

Sis-Suoma Sámesearvi Bárbmu rs ordne álbmotbeaivvi lahttodeaivvadeami Jyväskyläs Miriam's cafés dmu 18.00–19.30. Deaivvadeamis lea ulbmil gáfestallat, deajastallat, ságastallat ja ávvudit ovttas álbmotbeaivvi.

Helsset

Sámi álbmotbeaivi galggašii oidnot Helssegis dán jagi buorebut go goassege ovdal. Helssega gávpoga váldostivra mearridii ođđajagimánus, ahte sámi álbmotbeaivi galgá ávvuduvvot buot gávpoga skuvllain.

Helssega universitehtas beaivi ávvuduvvo levgemiin, gáfestallamiin ja bargobájiiguin. Maiddái oanehis sámi filmmaid lea vejolaš geahččat. Filmmat leat fállun eahkes eanetge Mini-Skábmagovain Davviriikalaš kulturviesus Kaisaniemis.

Espoo Sello girjerádjosis leat sámi álbmotbeaivvi gudnin earret eará spealut, girjjálašvuohta ja eará prográmma diibmu 17.00–19.30.

Musihkkajoavku Solju ja Ailu Valle loaiddastit Savoy-teahteris diibmu 19.00 rájes.

Jus dieđát sámi álbmotbeaivvi dáhpáhusaid, mat eai leat namuhuvvon dás, de cavgil midjiide. Sáddes šleađgaboastta čujuhussii sami.radio(at)yle.fi

Beaividuvvon 5.2.2019 diibmu 15:46. Lasihuvvon diehtu Ohcejoga gieldda rabas uvssaid beaivvis.

Beaividuvvon 5.2.2019 diibmu 9.10. Lasihuvvon diehtu Roavenjárgga Mini-Skábmagovat dáhpáhusas.

Beaividuvvon diibmu 10.15. Lasihuvvon diehtu Anára sámegielat nuoraid eahkedis.

Beaividuvvon 6.2.2019 diibmu 10.00. Lasihuvvon diehtu Jyväskylä deaivvadeamis.

Varrasamosat: Sápmi

Váldoođđasat

Varrasamosat

Muualla Yle.fi:ssä