Sápmi

Sámi allaskuvlla oahpaheaddjioahppit ohppe juoigat, lávlut ja dahkat mašiidnamusihka Ohcejogas – jietnamáilmmi ja musihka dovdan veahkkin boahtteáiggi ámmáhis  

Sámi allaskuvlla oahppit
Erika Niittyvuopio, Tonje Iren Anti ja Anna Helene Eira Persen leat oahpahallan musihkadahkama Ohcejogas. Govva: Vesa Toppari / Yle

Vahku áigge hárjehalle maid dahkat jietnamáidnasiid Sámi musihkkaakademiijas. 

Kárášjohkalaš Erika Niittyvuopio šloankala uvssa gitta ja seammás bádde jiena. Uvssa šloahkeheami son háliida laktit jietnamáidnasii, man son lea hábmemin musihka ja musihkkapedagogiija oahpuin Ohcejogas.

Son lea okta sis, guhte searvá vahku guhkkosaš oahppoollisvuhtii, man Sámi allaskuvla ja Sámi musihkkaakademiija lágidedje ovttas dán vahkus Ohcejogas. Oahpahus lea dárkkuhuvvon namalassii mánáigárdeoahpaheaddji- ja oahpaheaddjistudeanttaide, ja oahpahusa ulbmilin lea fállat musihkkabajásgeassimii veahkkeneavvuid.

Jienaid bádden.
Erika Niittyvuopio čoaggá jienaid jietnamáidnasii. Govva: Vesa Toppari / Yle

Oahpahusas váldojit vuhtii árbevirolaš sápmelaš vokálamusihkkašlájat ja musihkkapedagogihka sierra hámit. Oahpahusas ávkkástallet maid digitála veahkkeneavvuiguin.

Dákkár oahpahusa, mas leat beassan oahppat teorehtalaš vuođu lassin maiddái geavatlaš musihka ráhkadeami, oahppit atnet mávssolažžan. Leamaš vuogas, go ieš lea beassan báddet jienaid, lávlagiid ja de loahpas dihtoriin hábmet musihka ja jietnamáilmmiid máidnasiidda.

Jienaid sáhttá hábmet maid dihtoriin.
Musihkka ja jienat šaddet oktan duodjin dihtoris. Govva: Vesa Toppari / Yle

Kárášjohkalaš mánáidgárdeoahpaheaddjioahppi Anna Helene Eira Persen oaidná buoremus beallin dan, go oahpahus leamaš nu máŋggabealat.

– Mii leat lávlon ja juoigan hui ollu. Mun lean maid oahppan ođđa lávlagiid ja ođđa vugiid, mo geavahit musihka mánáidgárddis.

Vahku áigge oahppit leat Ohcejogas Sámi musihkkaakademiija guossis hárjehallan juoigat, lávlut ja dahkat mašiidnamusihka, ja vel hábmet daid olis jietnamáidnasiid. Sámi árbevieruid heiveheapmi leamaš hástaleaddji, muhto maid somá, oaivvilda kárášjohkalaš Tonje Iren Anti.

– Álggos go deike bohten, in lean áibbas sihkkar nagodango juoigat, muhto dál mun juoiggan.

Sámi allaskuvlla doavttirgráđastudeanta Annukka Hirvasvuopio-Laiti lea prošeavtta olis oahpahan sihke Sámi allaskuvlla ja musihkkaakademiija oahppiid miehtá Sámi. Son oaidná ovttasbarggu dehálažžan buohkaide.

Annukka Hisvasvuopio
Annukka Hirvasvuopio-Laiti lea Sámi allaskuvlla doavttirgráđastudeanta ja son oahpaha maid musihka. Govva: Vesa Toppari / Yle

– MIi leat seamma álbmot, mis lea seamma giella ja seamma musihkkaárbi, ja lea hirbmat dehálaš, ahte beassat bargat rájiid rastá.

“Sáhtášin searvat vaikko juohke jagi”

Sámi musihkkaakademiija lea riikkaidgaskasaš Interreg-prošeakta, mas leat mielde Ohcejoga gielda, Sámi allaskuvla ja Sámi oahpahusguovddáš. Prošeavtta ruhtadit Interreg Davvi Sápmi, Lappi Lihttu, Sámi allaskuvla, Davvekalohttaráđđi ja Ohcejoga gielda, ja dán vuoro prošeakta joatkašuvvá 30.9.2020 rádjai.

Sámi allaskuvllas, Ohcejoga gielddas ja Sámi oahpahusguovddážis leat goittotge sávvan oažžut prošeavtta bissovaš doaibman. Prošeavtta jođiheaddji Kati Eriksen lea ovdalis namuhan, ahte ulbmil lea oažžut doaimma bissovažžan.

Sami allaskuvllaoahppit
Oahpahusjoavku báddemin musihka. Govva: Vesa Toppari / Yle

Sámi allaskuvlla oahppiide maid heivešii, ahte sámemusihka oahpahus livččii bistevaš vuođu alde, ja ahte mánáidgárdeoahpuid golmma jagi linjás studeanttat beasašedje searvat vuđolut musihkkaoahpahussii dávjjit.

– Mii galggašeimmet beassat máŋgii searvat dán sullasaš oahpahussii, mas luohti ja sámemusihkka leat guovddážis. Leat oahppan dan, mo čatnat musihka ja luođi oktii, go dathan livččii dehálaš, ahte luohti oidnošii eambbo mánáidgárddis, loahpaha Anna Helene Eira Persen.

Geahča dán áššis lasi bearjadagaYle Ođđasiin Yle TV1:žis diibmu 16.45.

Varrasamosat

Muualla Yle.fi:ssä