Sápmi |

Sámi Arkiiva ráhkada digitála oahppanspealu Lemehaš-Biehtára birra

Dárkkuhussan lea ráhkadit speallodemo Suoma vuosttas sápmelaš girječálli Lemehaš-Biehtár, Pedar Jalvi ja su divttaid birra. Demo galggašii gárvánit dán čavčča áigge.

Lemehaš-Biehtár, Pedar Jalvi
Deatnogáddelaš Lemehaš-Biehtár, Pedar Jalvi (1888-1916) atnet Suoma vuosttas sámegirječállin. Govva: Vesa Toppari / Yle Sápmi

Sámi Arkiiva lea álggahan ovttas jyväskyläläš Zaibatsu-speallofitnodagain sámekultuvrii ja historjái vuođđuduvvi spealloprošeavtta.

Dárkkuhussan lea ráhkadit speallodemo Suoma vuosttas sápmelaš girječálli Lemehaš-Biehtár, Pedar Jalvi (1888–1916) ja su divttaid birra. Deatnogáddelaš Lemehaš-Biehtár jámii nuorran, 28-jahkásažžan geahpesdávdii ja su áidna iehčanas girjjálaš duodjin bázii dikta- ja muitalusčoakkáldat "Muohtačalmmit" (1915).

Speallodemoin hálidit doarjut sámegiela ja -kultuvrra oahppama ja oppalohkái muitalit sámekultuvrras ja historjjás.

Vuođđun Pedar Jalvi ávvujagi čájáhus

Spealloprošeavtta vuođđun lea posterčájáhus, man Sámi Arkiiva, Sámemusea Siida, Ohcejoga gielda ja Sámi Allaskuvla ovttas čohkkejedje diibmá, go Pedar Jalvi jápmimis dievai 100 jagi. Ávvučájáhus jođii miehtá Suoma ja Norgga.

Vuokko Hirvonen Sámi allaskuvllas ja Inker-Anni Linkola sihke Suvi Kivelä Sámi arkiivvas rahpe Pedar Jalvi -čájáhusa
Sámi allaskuvlla professor Vuokko Hirvonen, Sámi Arkiivva bajitdárkkisteaddji Inker-Anni Linkola ja arkiivva dikšu Suvi Pilvi King rahpe Pedar Jalvi -čájáhusa diibmá Ohcejogas. Govva: Jouni Aikio / Yle
Erenoamážit oahpaheaddjiid buorre máhcahaga dihte čájáhusbargojoavku hálidii ovddidit čájáhusa sisdoalu maiddái digitála birrasii.

– Árbevirolaš neahttačájáhusa sadjái Sámi Arkiiva čielggadišgođii vejolašvuođa dahkat čájáhusas spealu, mii olahivčče buorebut maiddái mánáid ja nuoraid. Prošeakta vulggii johtui, go fidniimet dasa ovttasbargoguoibmin Ohcejoga gieldda, Sámi Arkiivvas muitalit.

Bargojoavkkus viiddis áššedovdamuš

Pedar Jalvi -speallodemo bargojovkui gullet Sámi Arkiivva ovddasteaddjiid lassin maiddái ávvučájáhusa giehtačálli, Sámi Allaskuvlla professor Vuokko Hirvonen ja Ohcejoga gieldda ealáhusdoaimma prošeaktabargi Outi Laiti.

Laiti ráhkadii Pro gradu -barggus diibmá spealuid kodemis, daid oasis vuođđoskuvllaid ođđa oahpahusplánas ja hástalusain erenoamážit álgoálbmogiid dáfus. Laiti joatká dál seamma fáttá gieđahallama nákkosgirjjistis.

Juhkkojuvvo maiddái oahppomateriálan

Speallodemo galggašii gárvánit čavčča 2017 áigge.

Sámi Arkiiva lea ožžon prošektii Sámedikkis 10 000 euro veahkkeruđa. Sámediggi oažžuge vuoigatvuođa juohkit speallodemo nuvttá skuvllaid sámegiela ja sámegielat oahpahussii.

Varrasamosat: Sápmi

Váldoođđasat

Varrasamosat

Muualla Yle.fi:ssä