Sápmi |

Sámi bálgosiid oktasašsearvi barggu vuolde – Ii goit vel registrerejuvvon

Sámi bálgosat háliidit searvvi bearráigeahččat sin ovdduid go dovdet, ahte eai beasa váikkuhit sámi boazodoalu áššiide.

Asko Länsman mielas sámi bálgosat dárbbašit iežaset searvvi bearráigeahččat sámi boazodoalu ovdduid. Govva: Yle Sápmi

Sámi guovllu bálgosat leat vuođđudeamen iežaset searvvi vai sáhttet buorebut gohccit ovdduideaset. Sámi bálgosat háliidit bearráigeahččat erenoamážit sápmelaččaid ja sámi boazodoalu ovdduid, dadjá ohcejohkalaš badjeolmmoš, sámedikki várrelahttu ja Bálgosiid ovttastusa ráđđehusa lahttu Asko Länsman.

– Sámi boazodollui guoski áššiin sámi bálgosat dárbbašit bearráigeahčči, čilge Asko Länsman ođđa searvvi dárbbus. 

Asko Länsman evttohii sámi bálgosiid oktasaš searvvi jagis 2016, go dálá sámediggi čoahkkanii vuosttas geardde.  Son lea maid okta daid olbmuin, gii leamaš aktiivvalaččat  ovddideamen sámi bálgosiid oktasaš searvvi.

Searvi ceagganeamen čavčča mielde

Sámi bálgosiid oktasaš searvi ii lea vel vuođđuduvvon, muhto searvvi ceggen lea gal váldán ovtta lávkki ovddos guvlui. Sámi bálgosiid ovddasteaddjit čoahkkanedje Gilbbesjávrris borgemánus loahpas gieđahallat ášši. 

– Mii leat áigumin čavčča mielde registreret searvvi, go beare oažžut njuolggadusaid válmmašin, muitala Asko Länsman.      

Länsman čilge, ahte sii dieđihit dalán, go searvi lea virggálaččat registaris ja dasa sáhttá searvat.  

Varrasamosat: Sápmi

Váldoođđasat

Bivnnuhamosat

Varrasamosat

Muualla Yle.fi:ssä