Sápmi

Sámi boares skuvlagiddodagat leat iešguđetlágan geavahusas – Menešjávrri boares skuvla doaibmá dál hoteallan

Korpikartano
Menešjávrri boares skuvllas doaibmá dán áigge hotealla. Govva: Inger-Elle Suoninen

Sullii bealli Sámis doaibman skuvllain lea šat geavahusas.

Menešjávri Menešjávrre gáttis Anáris oarjelulás čuččot guokte stuorra rukses viesu. Viesut leat stuorra šilljus gos leat daid lassin maiddái goahti ja uhcit, vilges viessu. Lagamuš veaha stuorát gillái Anárii lea dás diibmobeali vuodjinmátki.

Dain viesuin doaibmá Korpikartano hotealla ja deike máŋggat turisttat háliidit boahtit návddašit jaskatvuođas.

Álot dát viesut eai leat bálvalan turismma. Vel sullii 15 jagi dassái viesut ledje skuvlageavahusas. Nubbi rukses viesuin lea doaibman skuvlan ja nubbi ásodahkan.

Menešjávrri skuvla
Mánát Menešjávrri skuvlla šiljus jagis 2000 dahje 2001. Govva: Jouni Aikio

Menešjávrri skuvla lea okta dain sámeguovllus heaittihuvvon skuvllain, mii lea nagodan nuppástuvvat turismageavahussii. Fitnodatdoalli Anne Harju muitala, ahte sii čilgejit buot galledeaddjiide báikki historjjá.

– Dát lea fiinnis go dás lea muitalus ja historjá. Mii leat doallan báikki muitalusa eallin. Mii muitalit buot min gussiide geat deike bohtet, ahte dákko lea skuvlaviessu ja duos fas lea ásodatviessu. Dieđusge muitalit maiddái, ahte mii leat dál Menešjávrri gili guovddážis, muitala Harju.

Harju muitala, ahte diehtu báikki historjjás johtá maiddai ovttasbargoguimmiid bokte geat leat vázzán skuvlla seamma visttis go gos dál turisttat idjadit.

Yrittäjä Anne Harju.
Fitnodatdoalli Anne Harju lea dál sullii logenar jagi buktan gussiid Menešjávrái Korpikartanoi. Ovdal boares skuvla lea hotellageavahausas eará oamastusas. Govva: Anneli Lappalainen

Olbmot bohtet ráfot Menešjávrái

Boares skuvla lea áibbas Menešjávrri gáttis ja dan birastahttá jaskes luondu. Boares skuvlla bálddas leat dušše muhtin dálut. Harju lohká báikki leat okta dasa sivva manin juste Menešjávrri skuvla lea dál turismageavahusas.

– Odne máilbmi lea nu hohppui, ahte olbmot háliidit ráfot, lohká Harju.

Go váldovissui lávke sisa ii jáhkášii, ahte viessu lea muhtimin doaibman skuvlan. Harju muitala, ahte earret eará láhtis ja lásain sáhttá vel oaidnit, ahte viessu lea muhtumin leamašan skuvla. Olgoriikkas boahtán turisttat eai goit soaitte dan fuomášit.

Koululaisia luokkahuonessa Menesjärvellä 1960-luvulla.
Skuvlalaččat luohkkálanjas Menešjávrri skuvllas 1960-logus. Skuvlla boares láhti sáhttá vel oaidnit váccáhagas. Govva: Siida
Menesjärven vanhan koulun nykyisen Korpikartanon lattia.
Hotealla váccáhagas sáhttá vel oaidnit boares skuvlla láhtti. Govva: Inger-Elle Suoninen

Seainnis heaŋgá maiddái rehkenastintabealla, mii muittuha hoteallaviesu historjjás. Maiddái muhtin eará diŋggat dego boares skuvlagirjjit mat leat gávdnon vuorkkáin leat gávdnan saji hoteallas.

Laskutikku.
Vistti seainnis lea rehkenastintabealla muittuheame báikki historjjás. Govva: Inger-Elle Suoninen

Gieskat Korpikartano fidnii ođđa fitnodatdoalli, go Harju lassin fitnodahkii mielde bođii Juha Nyström. Son lea álgán fitnodatdoallin geasset. Buot vulggii leaikkastallamis, muhto beannotjagi dan maŋŋá go oaččui vuovdinfálaldaga son lea mielde dás fitnodatdoaimmas. Sus leat olu jurdagat main son ii goittot vel nu beare ollu jietnat.

– Ideat leat olu, muhto geahččat dál moadde jagi, ahte boahtágo šilljui vel juoidá, lohká Nyström.

Yrittäjät Anne Harju ja Juha Nyström.
Fitnodatdoallit Anne Harju ja Juha Nyström pláneba juo hotealla boahttevuođa. Govva: Inger-Elle Suoninen

Sámi heaittihuvvon skuvllat leat iešguđetlágan geavahusas

Yle Sámi dieđuid mielde Suomabeale Sámis leat leamašan ovdal badjelaš 20 vuođđodási skuvlla. Odne sullii bealli dain lea vel doaimmas. Vuohčus okta, Anára gielddas njeallje, Eanodaga gielddas njeallje ja Ohcejoga gielddas golbma.

Boares skuvlagiddodagat leat iešguđetlágan ođđa geavahusas. Skuvlagiddodagain leat turismma lassin maiddai visttit ja muhtin boares skuvllain doibmet gilisearvvit.

Dál vuovdimassii leat Soađegili gielddas sihke Lokka ja Sompio skuvllat. Gieskat maiddái Anára girkosiidda boares skuvla vuvdui. Plánain lea, ahte jus Anára girkosiidda boares skuvla lea buori ortnegis huksejit giddodahkii visttiid ja duodjelanjaid.

Yle Sámi iđit ja Dearvva! -rádiosáddagiin sáhtát guldalit áššis eanet duorastaga 26.9. Sáddagiin gulat maid vásáhusaid das mot lei eallit ásodatskuvllain. Sáhtát muitalit maiddái iežat skuvlamuittuid Yle Sápmái dán artihkkalis.

Divvojuvvon 26.9 2019 diibmu 7:10 Anára gielddas leat dán áigge njeallje vuođđodási skuvlla.

Varrasamosat

Muualla Yle.fi:ssä