Sápmi |

"Sámi čoakkáldat máhccá dohko gosa gulláge, Siida-museai"

Museaguovddáš Vapriikki skeŋkii otne Tamperes mearkkašahtti čoakkáldaga Sámemusea Siidii. Siida-museas atnet skeaŋkka árvvus, dasgo doppe leat olu diŋggat mat eai leat Siidda čoakkáldagain, dego ovdamearkka dihte ládjogahpir.

Vapriikki skeaŋka Siida-museai.
Dát dávvirat máhccet ruoktot go Vapriikki skeŋkii daid Siida-museai. Govva: Vesa Toppari / Yle Sápmi

Museaguovddáš Vapriikki skeŋkii otne gaskavahku mearkkašahtti čoakkáldaga Sámemusea Siidii.

Vapriikki-museaguovddážis Tamperes leat jo badjel 100 jagi veallán boares sámediŋggat. Dál dat besset ruoktut, muitala Vapriikki sadjásaš čoakkáldathoavda Teemu Ahola.

– Smiehtaimet, ahte manin dát diŋggat obalohkái leat mis. Jurddašeimmet, ahte ii daid báiki leat Tampere, dat baicce gullet dohko, gos leat vižžojuvvonge, muitala Ahola skeŋkendilálašvuođas.

Ládjogahpir máhccá ruoktot

Dávviriid lea čoaggán dáiddár Gabriel Enberg jođedettiin Anára guovllus jagis 1905.

Čoakkáldagas leat sullii golbmalogi diŋgga, earret eará beakkán ládjogahpir. Dán oažžumis illudii earenomážit Siidda čoakkáldatmeašttir Marjo-Riitta Rantamäki.

– Dát lea vuosttas, stuorra čoakkáldat sirdin Siida-museai. Fiinna mearrádus! Dát addá midjiide hui olu. Mielde leat olu diŋggat mat min čoakkáldagain eai leat, ovdamearkka dihte ládjogahpir, mojohallá Rantamäki.

Siidda amanuensa Anni Guttorm oaidná, ahte čoakkáldaga sirdin lea skeaŋka olles sámeservodahkii.

– Dál lea álkkit boahtit dutkat diŋggaid, go dat leat min lahka, illudii Guttom gaskavahku Tamperes.

Historjjálaš diŋggaid beassá oaidnit Siiddas Anáris Flora-beaivvi dáhpáhusas miessemánu 13. beaivve.

Guldal ságaid Tampere skeŋkendilálašvuođas min Buorre iđit Sápmi -sáddagis duorastaga ja geahča tv:s Yle Ođđasiin duorastaga Yle TV1:žis diibu 15.10.

Varrasamosat: Sápmi

Váldoođđasat

Varrasamosat

Muualla Yle.fi:ssä