Sápmi |

Sámi Contemporary Berlinas – Suohpanterror dattetge mielde

Sámi dálá dáidaga čájáhus Sámi Contemporary rahpasii duorastaga Berlinas, Duiskkas. Čájáhusa lassin Sápmi oidno Berlinas čakčat klubbaeahkeda, bearaškulturfeastta, filbmačájáhusaid ja riekteseminára bokte. Suohpanterrorge lea dattetge mielde, vaikke giđđat vihkedalai čájáhusas geassádeami.

sámi contemporary suohpanterror suohpangiehta
Suohpangiehta oidno Berliinnas. Suohpanterror vihkedalai giđđat Berlina čájáhusas geassádeami, danin go ledje behtton dan vuohkái, mo Suoma stáhta meannudii sámeáššiiguin njukčamánus. Áššis goittotge soabadalle ustitlaš rabas ságastallamiin, muitala Suoma Duiskka-ambassáda preassaráđđeolmmái Merja Sundström. Govva: Suoma Duiskka-ambássada

Sámi dálá dáidaga čájáhus Sámi Contemporary rahpasii duorastaga Berlinas, Duiskkas. Gažaldagas lea seamma čájáhus, mii lea johtán miehtá Davviriikkaid.

Suoma Duiskka-ambassáda preassaráđđeolmmái Merja Sundström muitalii duorastaga ovdal Sámi Contemporary -čájáhusa rahpama, ahte čájáhussii lea vuordimis olu olbmot.

Sundstöm jahká ahte čájáhus boahtá oidnot viidát.

– Dáthan lea buot áiggiid stuorámus sámi dálá dáidaga oppalašgeahčastat ja dál midjiide leat almmuhan iežas olu eanet go maid oažžut váldit sisa oktanaga, nappo badjel 400 olbmo leat boahtimen. Mii diehtit ahte dohko leat boahtimen galleristtat ja earát dáidaga ámmátolbmot ja govvadáiddadoaimmaheaddjit, kulturdoaimmaheaddjit.

– Ja mii vuordit ahte dás boahtá várra olu báikkálaš aviissaide, ja mii leat jo ovddalgihtii addán doaimmaheddjiide olu informašuvnna. Ja doaimmaheaddjit leat fitnan davvin, rievtti mielde dát proseassa álggahuvvui jo beannot jagi dassái, ja boahtá gal oidnot máŋggain bláđiin.

Sámi kultuvra ja dáidda ovdan Berlinas čakčat

Merja Sundström muitala, ahte čájáhusa lassin sámi kultuvrra ja dáidaga buktet Berlinas ovdan earáge vugiiguin.

– Čakčamánus mis lea máŋga earáge dáhpáhusa. Lea dakkár geahppasot klubbaeahket gos lea dálá sámi musihka, dasto mis lea bearrašiide dakkár kulturfeasta man temán lea dán jagi sápmelašvuohta. Mis lea sápmelaš filmmaid ráidu dáppe Davviriikkaid ambassádaid oktasaš sajis, gosa gii beare sáhttá boahtit geahččat daid.

– Dasto mis lea duođalaš ášši čakčamánu loahpageahčen, dakkár riikkaidgaskasaš seminára man temán lea vehádagaid rievttit ja identitehtagažaldagat. Dohko bohtet davviriikkain ja maiddai Duiskkas logaldallit. Suomas boahtá ovdamearkka dihte Eva Biaudet.

Yle Sámi hoavda Pirita Näkkäläjärvi lea maid hállamin semináras.

Suohpanterror dattetge mielde

Anonyma dáiddár- ja aktivistajoavku Suohpanterror vihkedalai giđđat čájáhusas geassádeami, danin go ledje behtton dan vuohkái, mo Suoma stáhta meannudii sámeáššiiguin njukčamánus.

Áššis goittotge soabadalle ustitlaš rabas ságastallamiin, muitala Suoma Duiskka-ambassáda preassaráđđeolmmái Merja Sundström.

– Dat manai aivve ustitlaš rabas ságastallamiin. Min dárkkuhushan ii leat moge čiehkat dahje botnjat maidege, muhto baicce miihan dego vuodjit sápmelaččaid ášši, go mii buktit deike ovdan sápmelaččaid čájáhusa, mas sii ožžot iežas eavttuiguin muitalit iežaset oainnuid sápmelaččaid dálá dilis ja dálá dáidagis.

– Mis ii leat mihkkege sivva čiehkat dan, ahte sápmelaččaid sajádat lea dál politihkalaččat digaštallon, baicce dat muhtin láhkái dahká dan čájáhusa vel miellagiddevaččabun gehččiide.

– Ja dieđusge min intreassain lea dego Suomas ja davviriikkain dát rabasvuođa prinsihpa, ahte váldit ovdan áššiit ja hupmat rahpasit, ja de ohcat oktasaš čovdosa. Ahte dieđusge mii leat dan mielas ahte eamiálbmogiin leat seamma vuoigatvuođat go buot earáge olbmuin ja dáiddáriin lea vuoigatvuohta čájehit iežas dáidaga ja oažžut buhtadusa mii čuovvu soahpamuša. Ahte dain prinsihpaiguin mii bođiime soahpamuššii Suohpanterroriin. Ja dainhan leat hui buorit barggut ja min máidnosiin lea namalassii sin govva, ja dat sihkkarit boahtá geasuhit čájáhussii olu gehččiid, dadjá Sundström.

Sámi Contemporary -čájáhus lea oaidninláhkai Berlinas čakčamánu loahpa rádjai.

Varrasamosat: Sápmi

Váldoođđasat

Varrasamosat

Muualla Yle.fi:ssä