Sápmi |

Sámi diktačálli lohká divttaidis sámegillii Gaska-Amerihkás, ja guldaleaddjit dadjet su giella lea dego musihkka

Diktačálli Inger-Mari Aikio lea jorgalahttán divttaidis spánskkagillii, ja su leat bovden festiválaide Gaska- ja Mátta-Amerihkkái jo máŋgii.

Jietna: Yle Areena


Diktačálli Inger-Mari Aikio, Ima, beassá duollet dalle mátkkoštit miehtá máilmmi, go su divttat jorgaluvvojit máilmmi gielaide ja son lohká daid diktafestiválain.

Dán háve Ima lea johtán El Salvadorii, gos lágiduvvui diktafestivála. Miige luopmoreaissuid dat gal ii lean.

– Gal dat lei oalle garra vahkku El Salvadoris. Ii duođai miige luopmovahkuid. Doppe guokte, golbma diktalohkandilálašvuođa juohke beaivve. Iđđes vuosttas, beaivit nubbi ja eahkes sáhtii leat vel goalmmát, Aikio muitala.

Sus lea Gaska-Amerihkás vuordimis vel nubbi diktafestivála, mii lea Guatemalas. Ima oassálasttii mannan geasi maiddái diktafestiválii Bogotas, Kolumbias. Ima lea ilus, go bovdejuvvui dál El Salvadorii ja Guatemalai.

– Mun leamašan lihkkoš, ahte ammal dat mannan háve liikojedje munnje go bovdejedje ođđasit dan festiválii. Hirbmat somá, Aikio dadjá.

Dábálaččat dáid dilálašvuođain earát lohket divttaid spánskkagillii, ja Ima sámegillii. Divttat leat gal maiddái jorgaluvvon spánskkagillii ja giinu lohká daid de spánskkagillii.

Inger-Mari Aikio muitala, ahte diktalohkandilálašvuođaid maŋŋil sutnje leat olbmot boahtán rápmot, mo sámegiella lea nu čáppa giella, measta dego musihkka.

Dovdá iežas gullat buoremusat diktačálliid jovkui

Inger-Mari Aikio lea bargan eallimis áigge olu iešguđet dáiddasurggiin ja guhká maiddái doaimmaheaddjin. Diktačálliid joavkkus sus lea goit buot buoremus dovdu.

– Orru, ahte diktačállit lea áidna joavku, masa mun lean dovdan gullat. Mun ledjen 26 jagi doaimmaheaddjin inge goassige dovdan ahte mun lean albma doaimmaheaddji, inge dovdan ahte mun gulan doaimmaheaddjiid jovkui.

El Salvador diktafestiválas Ima jođii sullii 30 diktačálli joavkkus iešguđet báikkiin, dasa lassin báikkálaš diktačállit guhtege báikkis lohke divttaid singuin ovttas. Ima muitala, ahte olbmot leamaš hui ustitlaččat ja rahpasat.

– Mun lean nu lihkolaš go beasan leat dáppe eará diktačálliiguin iežan divttaid ovdanbuktit álbmogii, Inger-Mari Aikio lohká.

Inger-Mari Aikio
Dán govas ávvudit, go Inger-Mari Aikio ja golmma eará nissona divttat almmustahttojuvvojedje spánskkagillii. Govva: Melvyn Aguilar
Dál Inger-Mari Aikio áigu vuoiŋŋastit Bogotas Kolumbias skihpáriid luhtte ovdal Guatemala diktafestivála. Reaissut gal eai dasa goit noga.

Čakčat Ima johtá Keniai diktafestiválii, ja vejolaččat boahtte jagi Meksikoi. Dohko son áigu jorgalahttit maiddái iežas ođđa, erohtalaš diktagirjji divttaid sámegielas spánskkagillii.

Mokta johtimii orru leamen garas, vaikko muhtun áiggi dat gal válddii, ovdal go son duosttai vuolgit.

– Mus ledjen várra muhtin láhkái diená, ahte in gillen vuolgit in gosage ja háliidin beare leat ruovttus, ja dál lean fal dego beasihan, de dat lea nu johtinmiella, Inger-Mari Aikio árvala mojunjálmmiid.

Divvojuvvon 18.7.2018 diibmu 12:25: Divvojuvvon, ahte Inger-Mari Aikio oassálastá ovtta festiválii El Salvadoris ja nubbái Guatemalas, ii guovtti festiválii El Salvadoris, ja ahte El Salvador lea Gaska-Amerihkás, ii Mátta-Amerihkás, nu mo árat boastut muitaleimmet.

Varrasamosat: Sápmi

Váldoođđasat

Varrasamosat

Muualla Yle.fi:ssä