Sápmi |

Sámi Duodji -searvvi jođihišgoahtá Marjaana Aikio

Ođđa ságadoallái lea dehálaš, ahte Sámi Duodji -searvi bastá seailluhit ja gáhttet sámi duoji.

Marjaana Aikio
Sámi Duodji -searvvi ođđa ságadoalli Marjaana Aikio barga maiddái sámegiela oahppaheaddjin. Govva: Marjaana Aikio / Yle

Leammilaš Marjaana Aikio jođihišgoahtá Sámi Duodji -searvvi.

Skábmamánus válljejuvvon Sámi Duodji -searvvi ođđa stivra čoahkkanii válljet ságadoalli duorastaga Anáris.

– Munnje persovnnalaččat lea dehálaš, ahte lea ideologiija seailluhit ja gáhttet sámi duoji. Stivra bargá ovttas. Mis leat stivrras buorit, čeahpes várreságajođiheaddjit ja ja erenomáš čeahpes fásta bargi, geas lea guhkes áiggi vásáhus duodjekonsuleantan, dadjá Aikio.

Searvvis leat leamašan maŋimuš jagiid hástalusat, muhto maiddái buorit ovdáneamit. Dál searvvis leat ohcamin bargi ođđalágan Duodjebusse-bálvalussii. Duodjebusse, mas livčče sihke duodjebargi ja -mašiinnat, galggašii johttát miehtá Sámi guovllu giliid jo dán giđa.

Bargui geargá ain ohcat guokte vahkku.

– Dálá áigge lea dehálaš mannat dohko, gos olbmot leat. Lea oalle váttis vuolgit guhkes mátkkiid duohkái duddjot ja kurssaide, juos ii leat mainna johtit, smiehtada Aikio.

Doaibmasajit ain ohcanláhkái

Okta hástalus, mii searvvi lea váivvidan guhká, lea doaibmasajiid gávdnan Anáris. Searvvi duodjebuvda Duodji Shop bálvala dál sámekulturguovddáš Sajosis, muhto searvi ohcá ain doaibmasajiid iešguđetlágan duddjomii ja bargobajiid lágideapmái.

Duorastaga čoahkkimis searvvi stivrii válljejuvvojedje maiddái Sami Laiti várreságadoallin, Marja Näkkäläjärvi-Jomppanen nubbin várreságadoallin ja lahttun Kati Ljetoff. Stivrra várrelahtut leat Elen Anne Sara, Elle Valkeapää, Essi Kesti, Neeta Jääskö ja Ilmari Laiti.

Varrasamosat: Sápmi

Váldoođđasat

Varrasamosat

Muualla Yle.fi:ssä