Sápmi |

Sámi Duodji -searvvi oasusaddin ii olahan mihttomeriid, searvi smiehttá dál jotketko oasusaddima

Sámi Duodji -searvvis ledje ossosat merkenláhkái geassemánu loahpa rádjái. Ossosiid eai vuovdán nu olu go searvvis ledje vuordán, ja ságadoalli Neeta Jääskö sávváge olbmuid vel beroštuvvat áššis.

Neeta Jääskö Sámi Duodji saavâjođetteijee.
Sámi Duodji -searvvi ságadoalli Neeta Jääskö. Govva: Anneli Lappalainen / Yle

Sámi Duodji -searvi lea áigumen hukset ođđa doaibmadálu, ja fitnodaga opmodaga nannema váras Sámi Duodji -searvvis ledje ossosat merkenláhkái.

Searvvi ságadoalli Neeta Jääskö muitala, ahte vaikko olbmot leat muhtin veardde oastán ossosiid, báhce ossosat maiddái vuovddekeahttá. Searvi áiguge smiehttat, mo sii jotket áššiin.

– Mis leat leamašan dál smiehttamušat, ahte mo mii sáhtášeimmet joatkit dan oasusaddima, ja de mot das ovddos guvlui, go mii eat olahan min mihttomeari. Dat dagaha muhtin lágan čuolmmaid dál, go dat oasusaddin lea nohkan.

– Jos mii joatkit dan ossosiid addima, mii fertet das vuot dahkat buot almmuhusaid dohko pateanta- ja registerhálddahussii, ja dat lea áibbas iežas hommá. Mii galgat čoahkkanit dás farggabáliid ja smiehttat dan ášši vuđolaččat, muitala Jääskö.

Sávvá eandalii duojáriid beroštišgoahtit

Neeta Jääskö muitala leat veháš beahttášuvvan, go ossosat eai oston nu olu go sii ledje searvvis vuordán. Nuppe dáfus Jääskö lea fuobmán, ahte áššis gálggašii dieđihit eambbo.

– Jos mii vaikko rahpat vuohon dan oasusaddima, mii fertet smiehttat mo mii dieđihit das olbmuide. De olbmuide manná rivttes diehtu, ahte maid dat mearkkaša ja makkár ossosat leat vuovdinláhkái. Dat orru leamašan veháš eahpečielggas maiddái.

Jääskö árvala, ahte searvi bargagoahtá áššiin fas loahppagease dahje čakčat. Son sávášiige olbmuid vel beroštuvvat áššis.

– Mun sávan ahte olbmot beroštišgohtet dan áššis, eandalii duojárat. Ja ahte mii beassat nannet ja ovddidit iežamet doaimma plána mielde.

Varrasamosat: Sápmi

Váldoođđasat

Bivnnuhamosat

Varrasamosat

Muualla Yle.fi:ssä