Sápmi |

"Sámi eatnan duoddariid" čuodjá boahtteáiggis olles Sámi álbmotluohtin?

Áillohačča dovddus luohti "Sámi eatnan duoddariid" govvida bures sámiid ráhkisvuođa Sápmái, oaidná lávdegoddi.

Áillohaš rohttestii Sámi eatnan duoddariid -luođi báddái jagis 1978. Guldal dás, mo dat čuodjá. Video: YouTube

Sámi čearddalaš dovddaldagaid lávdegoddi evttoha, ahte Áillohačča, Nils-Aslak Valkeapää, dovddus luohti Sámi eatnan duoddariid šattašii Sámi álbmotluohtin.

Sápmelaččain lea juo iežas álbmotlávlla, Sámi soga lávlla, mii lea leamašan oassin sámiid ávvudemiid juo jagi 1992 rájes.

Sámiid 21. konferánssas Troandimis jagis 2017 evttohuvvui, ahte sápmelaččat válljejit alcceset maiddái álbmotluođi.

Lávdegoddi ákkastallá, ahte "Sámi eatnan duoddariid" lea dovddus šuokŋa, man juiget dávjá sámiid dilálašvuođain ja ávvudoaluin. Mánát birra Sámi ohppet dan juo hui árrat. Lávdegoddi jáhkká, ahte luohti muitala bures sápmelaččaid ráhkisvuođas Sápmái. Dat maid sisttisdoallá olu sámiid árbevieruid.

Jagis 1978 Áillohaš báddii luođi vuosttas háve ja 18 jagi maŋŋá son čálii dasa teavstta, mii almmustuvvui Girddán, seivvodan -girjjis jagis 1999.

Lávdegotti evttohusa gieđahallet Sámiráđi ordnen 22. konferánssas jagis 2021. Sámi čearddalaš dovddaldagaid lávdegotti lahtut leat Petra Biret Magga-Vars, Anders Kråik, Lars Anders Bær, Ol Johan Gaup, Thomas Åhren ja Anna Sakma.

Varrasamosat: Sápmi

Váldoođđasat

Varrasamosat

Muualla Yle.fi:ssä