Sápmi |

Sámi filbmadahkki Elle-Máijá Tailfeathers bálkkašuvvui Davvi-Amerihká stuorámus filbmafestiválas

Elle-Máijá Tailfeathers vuittii ovdáneaddji kanadalaš bagadalli bálkkašumi ođđaseamos filmmain ​Kímmapiiyipitssini: Empatiija mearkkašupmi. Filbma muitala das, mo opioidakriisa lea váikkuhan Kanai Nation blackfoot álbmogii ja mo sii dáistalit dan vuostá.

Elle-Máijá Tailfeathers Skábmagovain 2020.
Elle-Máija Tailfeathers lea filmmaidisguin vuoitán máŋggaid bálkkašumiid. Govva: Vesa Toppari / Yle

Čáhppesjuolgi-sápmelaš filbmadahkki Elle-Máijá Tailfeathers lea vuoitán buoremus bagadalli bálkkašumi Davvi-Amerihká stuorámus filbmafestiválas HotDoc:as. Tailfeathers vuittii ovdáneaddji kanadalaš bagadalli bálkkašumi ođđaseamos filmmain Kímmapiiyipitssini: Empatiija mearkkašupmi. Dasa lassin Tailfeathersa filbma bálkkašuvvui maiddái gehččiid kategoriijas.

Elle-Máijá Tailfeathers ođđa filbma muitala das, mo opioidakriisa lea váikkuhan Kanai Nation blackfoot álbmogii ja mo sii dáistalit dan vuostá.

Duopmáriid mielas Kímmapiiyipitssini: Empatiija mearkkašupmi lea muitalus ja láidesteapmi áššái, man lea dávjá sáhttán oaidnit dušše olggobealde.

Jagi 2014 rájes leat čuođit olbmot massán heakkas gárrenmirkováttisvuođaid geažil ja tragediija lea guoskkahan buohkaid blackfoot reserváhtas. Tailfeathers muitala áššis gárrenmirkkuide sorron olbmuid ja maiddái reserváhta dearvvašvuođabargiid bokte. Okta sis lea reserváhta doavttir Esther Tailfeathers, guhte lea bagadalli Elle-Máijá Tailfeathersa eadni.

Filmmas ovdanbuktojuvvo dat, mo reserváhta dearvvašvuođabargit leat váldán atnui ođđa ja radikála dikšunvugiid. Empatiijain sii geahččalit buoridit máŋggaid háviid, maid kolonialisma lea dagahan.

Tailfeathers mielde ođđa podcástas

Tailfeathers árat buvttadussii gullet earret eará Bloodland (2011), A Red Girl’s Reasoning (2012), mii kommentere eamiálbmotnissoniid goddimiid ja láhppomiid, sihke Bihttoš - Rebel (2014), man fáddán lea Tailfeathersa sápmelaš duogáš.

Elle-Máijá Tailfeathersa vuosttas guhkes ealligovva, ovttas Kathleen Hepburniin bagadallon The Body Remembers When The World Broke Open (2019) lea vuoitán máŋggaid bálkkašumiid ja leamašan kritihkkariid válljejupmi diibmá buoremus kanádalaš ealligovvan.

Elle-Máijá Tailfeathers lea guossin Suvi West doaimmahan Gieddegeašgálgu bálvaleaddjit -podcástaráiddu vuosttaš oasis.

Yle Ođđasiid Sámis ja Beaivvi ságaid sáhtát maid guldalit Yle Areenas.

Varrasamosat: Sápmi

Váldoođđasat

Varrasamosat

Muualla Yle.fi:ssä