Sápmi |

Sámi fitnodatdoalliin leat ruossalas dovddut restoráŋŋaid rahpamis – okta ii áiggo doapmat rahpat, nubbi vuordá jo beassat bargui

Ohcejohkalaš Petteri Valle smiehttá vel, mo ordnešii restoráŋŋadoaimma. Anárlaš Issu Suoninen fas áigu rahpat bára dalán geassemánus.

Petteri Valle
Ohcejohkalaš Petteri Valle ii leat áigumin rahpat restoráŋŋadoaimma vel geassemánu álggus. Govva: Vesa Toppari / Yle

Ráđđehus beasai maŋŋebárgga soahpamuššii restoráŋŋaid rahpamis geassemánu álggu rájes. Sámis eavttuid leat váldán vuostá ruossalas dovdduiguin.

Ohcejohkalaš fitnodatdoalli Petteri Valle giddii iežas restoráŋŋa jo ovdal, go ráđđehus mearridii restoráŋŋaid giddemis. Valle ii leat áigumin rahpat restoráŋŋadoaimma vel geassemánu álggus.

– Eat mii eiddo vuosttas beaivve gal áiggo rahpat, ahte mii geahččat, mo dán ferte ordnet.

Ráđđehusa mearrádusa mielde restoráŋŋat ožžot leat rabas eahket 11 rádjai ja alkoholavuovdin bistá logi rádjai. Restoráŋŋaid siste oažžu čohkkát dušše bealli dábálaš kundarmearis, muhto olgun terássain olbmuid mearri ii ráddjejuvvo.

Valle restoráŋŋas lea sadji 50 olbmui. Olmmošmeari go ráddje beliin, sáhtášii son bálvalit dušše 25 olbmo hávil.

– Orruhan dat vehá, ahte mo das fidne láibbi, dinego dainna ja eallágo dainna. Ja vel sáhttágo bargiid bálkkáhit olláge dál, smiehtada Valle.

Son ii duostta árvaladdat, goas fitnodatdoaibma beassá vuot dábálaš dillái.

– In duostta, ahte go Norgga rádjáge lea gitta ja doppe ii boađe midjiide mangelágan boahtu, de gal dat orru vehá issoras. Gal dat lea váttis dilli, dadjá Valle.

Guldal dá, mo ohcejohkalaš fitnodatdoalli Petteri Valle válddii vuostá ođđasa restoráŋŋaid rahpamis. Jietna: Susanna Guttorm / Yle

Anárlaš báraeaiggát vuordá juo beassat bargui

Báraeaiggát Ismael "Issu" Suoninen jođiha bivnnuhis olgobáikki Anára márkanis. Son lea buriin mielain ráhkkaneamen rahpat iežas bára dalán geassemánu vuosttas beaivve.

– Dál eai aŋkke galggaše leat makkárge váttisvuođat rahpat dalán.

Rabasáiggit eai váikkut sin borramušvuovdimii, muhto olbmot fertejit hárjánit dasa, ahte bára ii leat nu maŋŋidii rabas go dábálaččat, dadjá Suoninen.

Sii áigot maid fuolahit kundariid dorvvolašvuođas ja ovdamearkka dihtii merket dorvogaskkaid ja guođđit eambbo saji bevddiid gaskkaide.

Suoninen vuordá jo beassat bargui ja ordnet artisttaid konsearttaid maid farggabáliid.

Riikkabeaivvit galget gieđahallat restoráŋŋaid rahpaneavttuid jođánis áigetávvaliin.

Guldal dá, maid árvala Issu Suonen restoráŋŋaid rahpamis. Jietna: Susanna Guttorm

Varrasamosat: Sápmi

Váldoođđasat

Varrasamosat

Muualla Yle.fi:ssä