Sápmi |

Sámi gielddaid viššaleamos jienasteaddjit gávdnojit Ohcejogas – "Olbmot čuvvot politihka ja hállet hui aktiivvalaččat das"

Dáin riikkabeaiválggáin Guovddášbellodat massii doarjaga Ohcejogas, muhto Sosiálademokráhtalaš bellodat fas loktanii sakka.

Mika Aikio
Ohcejoga gieldda váldostivrra ságadoalli Mika Aikio oaidná, ahte ohcejohkalaččat leamašan álot hui aktiivvalaččat válggain. Govva: Vesa Toppari / Yle

Sámi gielddain čielgasit viššalepmosit jienastedje riikkabeaiválggain Ohcejogas, gos jienastanproseanta lei masá 75. Eará sámegielddain jienastedje láikkibut go olles Lappis ja Suomas gaskamearalaččat. Riikkadásis jienastanproseanta lei 72.

Ohcejoga gieldda váldostivrra ságadoalli Mika Aikio (SDB) oaidná, ahte ohcejohkalaččat leamašan álot hui aktiivvalaččat válggain, sihke gielddaválggain ja maiddái riikkabeaiválggain.

– Dáppe olbmot čuvvot politihka ja hui aktiivvalaččat hálletge das. Mu mielas dat lea buorre, ahte čuvvot mii birasmáilmmis ja -servodagas dáhpáhuvvá. In gal ollenge imaštala, manne lei nu alla jienastanproseanta, dathan lea dáhpi jo dáppe, dadjá Mika Aikio.

Jienastanproseanta
Govva: Yle

Sosiálademokráhtat nanosmuvai eanemus

Guovddášbellodat lea ain Sámi stuorámus bellodat. Suoma njealji davimus gielddas jienastedje ain buot eanemus guovddáža, vaikko dan doarjja geahppániige ovddit válggaid ektui.

Ohcejoga gielddas Guovddášbellodagas leamašan álot hui nana doarjja, muhto dáin válggain guottihus geahppánii sakka. Ohcejoga girkosiidda jienastanguovllus dat leige Sosiálademokráhtalaš bellodat, mii oaččui eanemus jienaid. Ohcejoga jietnadronnet lei bellodaga evttohas Anni Koivisto.

Ohcejoga gieldda váldostivrra ságadoalli Mika Aikio árvala, ahte sosiálademokráhtaid doarjaga loktaneapmái ledje máŋggat sivat.

– Mis lei iežas gilis buorre evttohas, guhte garrasit barggai válgabarggu. Dat lea dat vuosttamuš, manne mis loktanii guottihus nu olu.

– Dieđus nubbi ášši leamaš, mo guovddášbellodat ja maŋimuš ráđđehus leat bargan deike, mo dat leat váikkuhan dán guovllu áššiide. Deanu soahpamuš lea buot vearrámus, mii sáhttá, dadjá Aikio.

Sosiálademokráhtaid maŋŋá maiddái Ruoná lihttu nanosmuvai čielgasit Ohcejogas dáin válggain.

Varrasamosat: Sápmi

Váldoođđasat

Varrasamosat

Muualla Yle.fi:ssä