Sápmi |

Sámi giellabaromehter čielggada fas sámegielat bálvalusaid ollašuhttima ja gielalaš vuoigatvuođaid ollašuvvama

Sámebaromehter lea sáddejuvvon maid sámeguovllu olggobeallái dakkár olbmuide, geain lea merkejuvvon sámegiella eatnigiellan álbmotregisttaris.

Laura Arola
Sámi giellabaromehtera čielggadanbarggu bargá Laura Arola. Govva: Laura Arola / Priváhta

Riekteministeriija čielggada dál ovttas Oulu universitehta Giellagas-instituhtain sámegielat bálvalusaid ollašuhttima nu gohčoduvvon Sámi giellabaromehteras.

Ulbmilin lea čielggadit sámegielat olbmuid vásáhusaid bálvalusain ja giellabirrasiin. Guovddášfáddán leat dál čuvgehussuorggi bálvalusat.

Čielggadanbarggu bargá Laura Arola ja das lea mielde stivrenjoavku. Prošeavttas vástida jođiheaddjin Giellagas-instituhta hoavda Anni-Siiri Länsman.

Ávžžuha sámegielat olbmuid bivdit merket iežaset gielladieđuid álbmotregistarii

Jearahallanskovit sáddejuvvojit lagas beivviid áigge olbmuide, geaid eatnigiellan lea merkejuvvon álbmotregistaris sámegiella. Ohcejoga, Eanodaga ja Soađegili gieldda ássiide skovit sáddejuvvojit suoma- ja davvisámegillii. Anára gieldda ássiide ja sámiid ruovttuguovllu ássi olbmuide skovit sáddejuvvojit njealji gillii.

– Skoviid giela ii leat álo sáhttán válljet guđege vástideaddjái sierra, dasgo eanas sámegielat olbmuid eatnigiellan lea álbmotregistarii merkejuvvon dušše fal “sámegiella”, čállá Arola dieđáhusas.

Arola ávžžuha sámegielat olbmuid bivdit merket iežaset gielladieđuid álbmotregistarii.

– Lea boahttevuhtii ávkkálaš, jus olbmot dáhttot divvut iežaset gielladieđuid álbmotregistaris. Sámegiella ii maiddái leat merkejuvvon buot sámegielat olbmuid eatnigiellan álbmotregistarii, ja dakkár olbmuide ii leamaš vejolaš sáddet jearahallanskovi.

Oassi riekteministeriija giellamuitalusas riikkabeivviide

Giellabaromehter dahkkojuvvui maŋimuš háve jagis 2016. Dalle vástideaddjin ledje goittotge sámiid ruovttuguovllu gielddaid ássit. Dán háve giellabaromehter sáddejuvvo maid sámi ruovttuguovllu olggobeallái.

Riekteministeriija bargun lea čuovvut giellalága ollašuhttima ja dan heiveheami. Sámebaromehter lea oassi dán čuovvunbarggu, nappo giellamuitalusa, mii doaimmahuvvo riikkabeivviide.

Giellamuitalusas boahtá ovdan, mo ovdamearkka dihte gielalaš vuoigatvuođat leat ollašuvvan. Giellamuitalusas leat suoma- ja ruoŧagiela, sámegielat, románagiella ja seaivvagiela.

Varrasamosat: Sápmi

Váldoođđasat

Varrasamosat

Muualla Yle.fi:ssä