Sápmi |

Sámi Giellagáldu bargin álggahit Lehtola, Semenoff ja Magga – jođiheaddjin joatká Marko Marjomaa

Sámi Giellagáldu giellabargit ja -juhkosat bargagohtet ođđajagimánus.

Marko Marjomaa.
Marko Marjomaa joatká Giellagáldu gaskaboddosaš jođiheaddjin. Govva: Xia Torikka / Yle Sápmi

Sámi Giellagáldu doaibmagoahtá Suoma beale Sámis dievas fárttain jo ođđajagimánus.

Sámediggi dieđiha, ahte Sámi Giellagáldu anárašgiela giellabargin lea válljejuvvon Henna Lehtola, nuortalaš giellabargin Mervi Semenoff ja davvisámegiela giellabargin Bigga-Helena Magga. Doaimmahatčállin lea válljejuvvon Hannele Sieppi. Sii buohkat álggahit ođđajagimánu áigge. Giellajuhkosat bargagohtet seamma áiggiid. Giellagáldu gaskaboddosaš jođiheaddjin joatká Marko Marjomaa.

Giellagáldui ohcagohte ođđa bargiid juovlamánus, go Suoma riikkabeivviid stáhtaruhtaváljagoddi mieđihii Giellagáldui 190 000 euro lasseruđa. Čakčat Suoma stáhta bušeahttaárvalusas Sámi Giellagáldu doibmii evttohedje 184 000 euro, mii lei dušše bealli dárbbašuvvon supmis. Dalle balle, ahte Giellagáldu doaimma šaddet geahpedit. Stáhtaruhtaváljagotti lasáhusa ánssus doibmii ožžo oktiibuot 374 000 euro, ja dainna ruđain Sámediggi sáhtii ohcagoahtit Giellagáldui bargiid olles dán jahkái.

Sámi Giellagáldu lea Sámi Parlamentáralaš ráđi vuollásaš orgána, mii seailluha ja ovddida sámegielaid kulturárbbi. Giellagáldu earret eará dohkkeha ođđa sániid, normere čállingiela, gáhtte giela, juohká dieđuid sámegielain, bargá báikenamaiguin ja nammabálvalusain, ja fállá giellarávvenbálvalusa. Giellagáldu bargá buot davviriikkain davvisáme-, lullisáme-, julevsáme-, anáraš- ja nuortalašgielaiguin.

Varrasamosat: Sápmi

Váldoođđasat

Varrasamosat

Muualla Yle.fi:ssä