Sápmi |

Sámi heargi lei sekundda ovddabealde earáid ovdal loahppagilvvu – Heargeeaiggát ii sáhttán oađđitge, go lei nu gealdagasas

Luosto heargegilvvuin mašiidna vuorbádii dakkár superstártta, ahte buohkat ledje gealdagasas. Loahpas sámi hearggit ledje njunnošis.

Tomi Vartiainen ja Spiella-heargi.
Tomi Vartiainen ii sáhttán oađđitge, go su ja Asko Länsman heargi lei vuoittus gitta. Govva: Kaija Länsman / Yle

Sotnabeaivve Luosto gilvobáikkis šlaggá iđitgáfe almmái, guhte orru oktanaga sihke váiban ahte lihkolaš. Njuorggánlaš Tomi Vartiainen ii leat oađđán menddo máŋga čalbmerávkaleami, ja lea jo iđitviđás boahtán hearggis lusa, man oamasta beallái ovttas Asko Länsmaniin.

– Mun lean lihkkan ovdal njealji. Lean nu gealdagasas, leamašan olles ija. Lea buorre, go lea dákkár dovdu, dallehan dávjá manná bures, govvida dovdduidis Vartiainen.

Spiella lea Länsman ja Vartiainen guoktá heargi Gálddoaivvi bálgosis. Dat ruohtai lávvardaga sekundda buoret áiggi, go oktage eará (1:19.527). Dat mearkkašii ovdal sotnabeaivvi finálaid dan, ahte Spiellas lei issoras buorre vejolašvuohta vuoitit.

Luosto gilvvuin vudje áiggi, eai gahčahanvuoju. Áigegilvu dárkkuha dan, ahte lávvardaga ja sotnabeaivve gilvoáiggiid rehkenaste oktii ja dat, geas lei buoremus áigi, vuittii.

Luosto heargegilvvuid superstárta.
Ovtta stártii deive golbma garra hearggi. Máŋgasa mielas dát lei nu miellagiddevaš stárta, ahte dán dálvvi eai lean dákkára vásihan. Govva: Kaija Länsman / Yle

Dáin gilvvuin earenomáš lei dat, ahte mašiidna lei deaivan vuorbádit seamma stártii golbma hearggi, mat ledje lávvardaga maŋŋá gilvvus viđa buoremus siste. Annin Suivakko (oamasteaddji Vuolab/Portimo, Báišduoddara bálgosis) ruohtai lávvardaga áiggi 1:20.838 ja Mellakka (oamasteaddji Hannu Krupula, Isosydänmaa bálgosis) fas ruohtai 1:21.341.

Heargegilvoberošteaddjiide leige čielggas, ahte dán stárttas lea vuoiti.

– Diet lea dássidis joavku ja buohkat várra bohtet báldda báldda molii. Viehka sihkkarit Spiella vuoitá, árvalii avvillaš Juha Mikkola ovdal superstártta.

Heargeberošteaddjit.
Iđitgáfe jugadettiin heargegilvaleaddjit vuorddašedje jo beaivvi garraseamos stártta. Govas avvillaš Juha Mikkola ja ovdaravddas Tomi Vartiainen. Govva: Kaija Länsman / Yle

Go viimmat vurdojuvvon stárta álggii, de easkka šattaige gelddolaš. Spiella bázii maŋimužžan ja Mellakka válddii njunušbáikki.

Go hearggit ledje ruohttan kilomehter mátkki, de ledje guhkes sekunddat vuordit, go áiggiid rehkenaste oktii.

Nákciigo vuosttamužžan molii boahtán Mellakka vuoitit, vai ruohtaigo Spiella dattetge doarvái buori áiggi, vaikko joavddaige maŋimužžan molalinnjá badjel?

Video: median oletuskuva, musta laatikko
Video: Vesa Toppari / Yle

Loahppabohtosiin čielggai, ahte Spiella vuittii olles gilvvu áiggiin 2:40,484 ja Mellakka bázii loahpalaš bohtosiin njealjádin. Nubbin olles gilvvus bođii Severi, man oamasta Saana Länsman Gálddoaivvis. Goalmmádin loahppagilvvus lei Annin Suivakko, man oamasteaba Vuolab Juha ja Portimo Anni Báišduoddara bálgosis.

– Ii dat nu bures ruohttan, muhto njunnošii dat manai, muitalii Vartiainen.

Ándde-Niillas Länsman, guhte lea nuppi heargeeaiggáda áhčči, lei maid duđavaš.

– Otne das ii lean buhtes ruohttan. Mun vurden, ahte dat vuoitá. Dat lei ikte jo nu olu guođđán daid earáid.

Oula Sara Luosto heargegilvvuin.
Oula Saras lea nana jáhkku sámi herggiide. Govva: Vesa Toppari / Yle

Jáhkká sámi hearggi vuoitit gonagasgilvvuid Anáris

Oula Sara Sállevári bálgosis lea guhká johtán heargegilvvuin. Sara jáhkká, ahte dán jagi gonagasgilvvu vuoitá sámi heargi, go dan leat álgodálvvi gilvvut čájehan sutnje.

– Dat birgejit ja bures. Dat lea álgodálvi jo čájehan čielgasit, geain leat dat falis vuojánat ja geat leat máhttán hárjehit herggiid. Mu oaivvis gal lea čielggas, ahte sámi vuojánat dat birgejit Anáris mihá bures, einnosta Sara.

Gonagasgilvvut ordnejuvvojit Anáris 30.–31.3.2019. Ovdal dan vudjet vel guokte Boazocup oassegilvvu, namalassii 15.–17.3.2019 Ranuas ja 23.–24.3.2019 Lankojärvis.

Gonagasgilvvuide besset oasálastit 24 Boazocup buoremus ja falimus hearggi.

Varrasamosat: Sápmi

Váldoođđasat

Varrasamosat

Muualla Yle.fi:ssä