Sápmi |

Sámi leanadáiddárin dánsu Auri Ahola – "Háliidan ovddidit maiddái ođđa dáiddašlájaid"

Anárlaš Auri Ahola bargá sámekultuvrra leanadáiddárin čuovvovaš vihtta jagi.

Auri Ahola stobus ovddas
Auri Ahola bargu lea ovddidit ja nannet sámekultuvrra nu riikkadásis go maid riikkaidgaskasaččat. Govva: Linnea Rasmus / Yle Sápmi

Anárlaš baleahtadánsu Auri Ahola válljejuvvui ovdal juovllaid sámekultuvrra leanadáiddárin čuovvovaš viđa jahkái. Ahola lea álggahan barggus iluin. Son bargagođii ođđa virggistis geassemánus.

– Dat lei gal mu eallima hávskimus vahku, ledjen mánáid láhkai dalle jo ovccát mánus, go fitnen bargojearahallamis stuorra čovjjiinan. Bargojearahallan lei vuossárgga, gaskavahkko ožžon dieđu ahte mu válljejedje dan bargui ja lávvardaga mu gánddaš riegádii, boagusta Ahola.

Sámekultuvrra leanadáiddár oassálastá sámedáiddáriid ja eará kultursuorggi doaibmiid gaskasaš prošeavttaide ja oktasaš buvttademiide sámeguovllus. Doaibmagovvii gullá maiddái ovttasbarggu huksen ja ovddideapmi Lappi doaibmasuorggi lassin olles riikkas ja riikkaidgaskasaččat. Ovdal bargu lea bistán golbma jagi, muhto dál Dáidaga ovddidanguovddáš TAIKE mearridii guhkidit virggi viđa jahkái.

"Lea dehálaš, ahte leat ođđa dáiddašlájat ja dáiddárat"

Auri Ahola šattai dovddusin baleahtadánsun ja lea dánson earet eará Suoma álbmotbaleahtas. Son muitala, ahte sus lea juo bargoplána alcces dán viđa jahkái, muhto son lea rabas ođđa prošeavttaide.

– Dál go dat bargu vuolgá albma láhkai johtui, de oainnán makkár prošeavttat šaddet. Dieđus dánsun lea mu dáiddašládja, de háliidan ovddidit namalassii dánsuma ja teáhtera, muhto mun barggan olles sámekultuvrra ovdii. Munnje sáhttá váldit oktavuođa, jus háliida ordnet konseartta, bargobájiid, semináraid ja nu ain.

– Mu bargun ii leat dál leat dat "násti" ja dánsut, baicce mun barggan dál sámekultuvrra ovdii ja sámekultuvra lea dál dat násti, lohká Ahola.

Auri Ahola
Auri Ahola lea maid doallan baleahttadiimmuid mánáide anárašgilli. Govva: Jonne Järvinen / Yle Sápmi

Auri Ahola áiggošii ovddidit sámekultuvrra ja dáidaga nu, ahte sámedáidda livččii oidnosis nu riikkadásis go maiddái riikkaidgaskasaččat. Son sávašiige, ahte sámedáiddárat oččošedje bargovejolašvuođaid miehtá máilmmi. Dehálamos sutnje lea beassat ovddidit ođđa dáiddašlájaid.

– Dieđusge árbevirolaš kultuvra lea dehálaš. Dashan dat buot álgá, muhto lea dehálaš ahte mis leat ođđa dáiddašlájatge ja ođđa dáiddárat. Livččii somá oaidnit ovdamearkka dihte sápmelaš sirkusdáiddára, smiehtada Ahola.

Guldal Auri Ahola jearahallama Yle Areenas.

Varrasamosat: Sápmi

Váldoođđasat

Varrasamosat

Muualla Yle.fi:ssä