Sápmi |

Sámi musihkkaakademiija ordne olles beaivvi festivála borgemánus – váldoartisttat leat musihkkaakademiija studeanttat

Festivála artisttat leat Anna Lumikivi, Laura Tapiola, Heli Aikio, Anna Morottaja, Heli Huovinen ja Mihkku Laiti.

Sámi Musihkkakademiija stuđeanttat gurot bealde olgešguvlui: Heli Aikio, Laura Tapiola, Anna Morottaja ja Heli Huovinen. Govva konsearttas jagis 2019.
Sámi Musihkkakademiija stuđeanttat gurot bealde olgešguvlui: Heli Aikio, Laura Tapiola, Anna Morottaja ja Heli Huovinen. Govva konsearttas jagis 2019. Govva: Sámi Musihkkaakademiija

Sámi musihkkaakademiija ordne olles beaivvi festivála Ohcejogas 29.8. diibmu 16 rájes. Dan sáhttá čuovvut maiddái neahtas njuolggosáddaga bokte.

Festivála váldoartisttat leat Sámi musihkkaakademiija studeanttat iežaset soloprográmmaiguin ja ámmátmusihkkariiguin. Konsearttain gullojit sámegielat lávlagat sihke luođit ja livđet árbevirolaš hámis ja maiddái ovttas čuojanasaiguin.

Valjis prográmma – šattaige festivála iige konsearta

Sámi musihkkaakademiija jođiheaddji oahpaheaddji Anna Näkkäläjärvi-Länsman muitala, ahte jurdda festivála ordnemii bođii juo áigá.

Go sii ledje plánemin Musihkkaakademiija nuppi jagi oahpuid ja musihkkaoahpuin bođii guovttejahkásaš ollisvuohta, stuđeanttaide galggai ordnet vejolašvuođa musihkkadutkosa ovdanbuktimii konseartahámis. Oahppit ledje máŋgasat ja prográmma orui leamen olu boahtinláhkai. Dat bohciidahtii Näkkäläjärvi-Länsmanii jurdaga, ahte prográmma gávdno olles beaivvi festiválii.

– Dasto go rehkenasten oahppiid ja áddejin, man duođain ollu mis leat artisttat, álgen smiehttat, ahte dás gal šaddá eambbo festivála go konsearta, mojohallá Näkkäläjärvi-Länsman.

Sámi musihkkaakademiija jođiheaddji oahpaheaddji Anna Näkkäläjärvi-Länsman muitala, ahte jurdda festiválas bođii juo áigá.
Sámi musihkkaakademiija jođiheaddji oahpaheaddji Anna Näkkäläjärvi-Länsman muitala, ahte jurdda festiválas bođii juo áigá. Govva: Kaija Länsman / Yle

Álgoálggus festivála galggai leat miessemánus, muhto koronavirusa dagahan spiehkastatdili dihte dat lea sirdojuvvon borgemánnui. Nugo máŋggat skuvllat, maiddái Sámi Musihkkaakademiija sirdašuvai dán giđa gáiddusoahpahussii.

Spiehkastatgiđas ja gáiddusoahpahusas fuolatkeahttá Näkkäläjärvi-Länsman muitala, ahte sii leat geargan bures ráhkkanit konsertii.

– Gáiddusoahpahus lea buktán hástalusaid, muhto maiddái hirbmat buriid čovdosiid musihka ektui. Dušše ovttas čuojaheapmi ii lihkostuva neahta bokte. Goittotge mii leat ráhkkanan bures ja lihkus geargat vel borgemánus hárjehallat ovttas, čilge Näkkäläjärvi-Länsman.

Stuđeanttat ieža dáiddalaš jođiheaddjit ja artisttat

Festivála artisttat leat solistalinnjá stuđeanttat Anna Lumikivi, Laura Tapiola, Heli Aikio, Anna Morottaja, Heli Huovinen ja Yungmiqu nappo Mihkku Laiti. Konsearttain gullojit sámegielat lávlagat, luođit ja livđet árbevirolaš hámis ja maiddái ovttas čuojanasaiguin.

Juohkehaččas lea iežas solokonsearta ja Yungmiqu doaibmá ráppemiin konsearttaid liggedeaddjin.

Anna Näkkäläjärvi-Länsman illuda, go stuđeanttat leat oahppojagi áigge beassan ráfis dutkat iežaset artistavuođa ja makkár musihka sii háliidit dahkat.

– Illudan, go min stuđeanttat leat beassan leat sihke dáiddalaš jođiheaddjit ja artisttat, muitala Näkkäläjärvi-Länsman.

Koronadilli sáhttá váikkuhit festivála lágideapmái

Vuosttažettiin jurddan lei ollašuhttit dábálaš konseartta báikki alde, muhto eahpesihkkaris dili dihte sii mearridedje ordnet konseartta sihke báikki alde ja stream-hámis neahtas.

Anna Näkkäläjärvi-Länsman muitala, ahte sii čuvvot Suoma ráđđehusa ja Ohcejoga gieldda njuolggadusaid ja lágidit festivála daid rávvagiid vuođul. Go koronadili čakčat ii vel dieđe, vel ii dieđe man olu gehččiid sii sáhttet váldit báikki ala vai sáhttetgo váldit olbmuid olláge.

– Guhkká joraheimmet ja smiehtadeimmet, mo gánnehivččii dáinna festiválain dahkat. Dieđusge sávašeimmet sále dievva olbmuid geahččat, muhto go ii vel dieđe, bohtetgo ođđa ráddjehusat, de lea buorre sihkkarastit konseartta ollašuhttima maid stream bokte.

Anna Näkkäläjärvi-Länsman deattuha, ahte lea dehálaš sihkkarastit buohkaid dorvvolašvuođa ja áigi čájeha dárkilut ortnegiid festivála ektui.

– Mun in justa dieđe vel mii dat olmmošmearri boahtá leat, muhto mii addit lagabut borgemánus dieđu, mo konsertii sáhttá searvat. Goittotge borgemánu maŋimus vahkkus galgá geahččat ođđasit, mii dat dilli lea, man olu mii sáhttit váldit olbmuid vai sáhttitgo váldit olbmuid oppanassiige, čilge Näkkäläjärvi-Länsman.

Sámi musihkkaakademiija festivála ordnejuvvo Ohcejohnjálmmis ja livestreamis 29.08. dii 16 rájes. Sisabeassan lea nuvttá ja festivála lea oaivvilduvvon buot ahkásaččaide.

Dárkilut dieđuid sáhttá lohkat Sámi musihkkaakademiija neahttasiidduin.

Guldal Anna Näkkälärvi-Länsman jearahallama dás. Jietna: Pinja Pieski / Yle

Varrasamosat: Sápmi

Váldoođđasat

Varrasamosat

Muualla Yle.fi:ssä