Sápmi |

Sámi njunušartisttat almmustahtte skearruid Ijahis ijas

Ijahis Idja eamiálbmogiid musihkkafestiválas almmustuvai olu ođđa musihkka. Festiválaolbmot besse gullat ođđa musihka sihke bearjadaga ja lávvordaga. Annamáret Ensemble ja Ulla Pirttijärvi ja Ulda-joavku dolle almmustahttinkonsearttas lávvordaga álgoeahkedis. Bearjadaga Amoc almmustahtii digisingles Kiälláseh.

Video: Ulla Pirttijärvi & Ulda Ijahis ijas 2016
Video: Yle Ođđasat 23.8.2016

Ijahis idja -festivála lei mannán vahkoloahppa Anáris. Festiválas olbmot besse gullat olu ođđa musihkka go bearjadaga anárašrappar Amoc nappo Mikkal Morottaja almmustahtii digisingles ja lávvordaga álgoeahkeda Ulla Pirttijärvi & Ulda-joavkus ja Annamáret Ensembles lei almmustahttinkonseartta Sajosa auditorias.

Annamáret Ensemble ja Ulla Pirttijävi & Ulda gesse sále dievva olbmuid

Sále lei dievva Annamáret Ensemble nuppi skearru Gollehelmmot almmustahttinkonsearttas. Gollehelmmot-skearu musihkka muittuha joavkku vuosttaš skearru, muhto ođđa iešvuođat leat skearu teavsttain.

Annamáret Ensemble skearru Gollehelmmot.
Govva: Inger-Elle Suoninen / Yle Sápmi

– Na mun jáhkán, ahte dat lea várra olbmuidege somá, ahte dat lea veahá ođđalágan, muhto vuođđuhan gal lea die nu dieđusge seamma go mus lea seamma musihkkarat ja ieš lean ráhkadan daid bihtáid dieđusge dat vuođđu lea seamma, muhto gal mun vuorddán ahte dat duon lea miellagiddevaš olbmuide, dadjá Anna Näkkäläjärvi-Länsman.

Pirttijärvii lei lunddolaš almmuhit skearru Anáris

Ulla Pirttijärvi ja Ulda-joavku almmustahtii maiddái nuppi skearrus Roijk. Skearru namma boahtá sániin rock ja joik.

Anár lea Pirttijärvi-Länsman ruovttuguovlu ja danin Ijahis idja lei lunddolaš báiki almmuhit skearru.

Ulla Pirttijärvi & Ulda skearru Roijk.
Govva: Inger-Elle Suoninen / Yle Sápmi

– No dat dat gal dát Ijahis idja festivála heivii hui bures dása ja duon dáppe lea hirbmat buorre Sajosis dat sálet ja jietna lea buorre ja diená. Ja dieđusge dat lea mu ruovttuguovlu Anára gielda, ahte go lean dáppe guovllus eret de lunddolaččat de lei somá dáppe almmustahttit dan, muitala Pirttijärvi-Länsman.

Amoc almmustahttii digisingle ja musihkkavideo

Olbmot besse gullat maiddái ođđa anárašgielat musihka go Amoc almmustahtii ođđa digisingles Kiälláseh Ijahis Ijas bearjadaga.

Ovddit háve Amoc lea addan musihkka olggos jagis 2007. Amoc muitala ahte almmustahttima maŋŋel lei ártet dovdu.

Amoc Ijahis ijas 2016
Govva: Paadar Images / Ijahis idja
– Veahá ártet, dashan lea fargga logi jagi,  go bođii dat maŋimus virggálaččat almmustahttojuvvon bihtá. Dál dat  lea dakkár konkrehtalaš álgu das, ahte fargga boahtá ođđa skearru, ahte gal das lea dakkár positiivvalaš smáhka, muitala Amoc.

Digisingle lassin Amoc almmustahtii bearjadaga maiddai musihkkavideo. Dan sáhttá geahččat YouTubes.

Eanet dán áššis disdaga Yle Ođđasiin dbm 15.15 Yle TV1:žis.

Varrasamosat: Sápmi

Váldoođđasat

Varrasamosat

Muualla Yle.fi:ssä