Sápmi |

Sámi nuorain čielga diehtu ráđđehusráđđádalliide: ”Mii eat hálit Jiekŋameara ruovdegeainnu”

Suoma Sámi Nuorat -searvi ja Greenpeace dat ordnejedje ovttas diehtojuohkinakšuvnna gaskavahkkoiđđes Helssegis Säätytalo olggobealde.

Suoma Sámi Nuorat ja Greenpeace Säätytalo Helsset
Hildá Länsman, Áile Risten Holmberg ja Petra Laiti ledje otne Helssegis Säätytalo olggobealde muitaleame man oaivilis leat plánejuvvon Jiekŋameara ruovdegeainnus. Govva: Greenpeace

Rukses banderollat báite guhkás, go Suoma Sámi Nuorat -searvvi lahtut ja Greenpeace ovddasteaddjit ledje gaskavahkko iđđes čoahkkanan Säätytalo olggo beallái Helssegii. Diehtojuohkinakšuvnna ulbmilin lei muittuhit ráđđehusráđđádalliid das, ahte sámi nuorat gal eai hálit Jiekŋameara ruovdegeainnu. Vaikko ráđđádalliin lei hoahppu cegget Supmii ođđa ráđđehusa, de sii aste goit lonuhit moadde sáni sámi nuoraiguin.

– Viehka viššalit dat olbmot bisánedje ja guldaledje mii mis lei dadjat ja hui máŋgasat válde vuostá maiddái dan min flaijeri. Máŋgasat bohte lohkat midjiide, ahte dát fáddá lea dakkár man birra mii fertet hállat ja ahte mii doarjut din oainnu, ahte dieđusge sámiin galgá leat dadjamuš dán áššis. Gal ledje hui positiiva ságat, mat doppe gullojedje, muitala Suoma Sámi Nuoraid -searvvi ságadoalli Petra Laiti.

Suoma Sámi Nuorat ja Greenpeace Säätytalo Helsset
Suoma Sámi Nuorat -searvvi ságadoalli Petra Laiti. Govva: Greenpeace

“Muittuhus das, ahte geas dat rivttes diehtu gávdno”

Suoma Sámi Nuorat -searvi vuostálastá Jiekŋameara ruovdegeainnu huksema gaccaid bániid. Petra Laiti mielas lei dehálaš muittuhit ráđđehusráđđádalliid áššis, go lea goittotge sáhka aktiiva ja áigeguovdilis fitnus.

– Bázii dakkár dovdu, ahte dat otnáš diehtojuohkinakšuvdna lei gánnáhahtti. Dat loahpalaš fápmu mearridit ruovdegeainnus lea goittotge riikabeivviin. Ja dat lei maiddái muittuhus das, ahte gávdnojit olbmot geain sáhttá oažžut rivttes dieđu das, ahte makkár váikkuhusat sámiide livčče dán fitnus, dadjá Laiti.

Suoma ráđđehusráđđádallamat joatkašuvvet ain Helssegis Säätytalos. Mannan vahkkus Sámediggi deaivvai ráđđehusráđđádalliid njunnoša Antti Rinne ja maiddái eará riikabeaiovddasteaddjiid.

Suoma Sámi Nuorat ja Greenpeace Säätytalo Helsset
Áile Risten Holmberg jugii flaijeriid ráđđehusráđđádalliide. Govva: Greenpeace

Varrasamosat: Sápmi

Váldoođđasat

Varrasamosat

Muualla Yle.fi:ssä