Sápmi |

Sámi oahpahusguovddáš ávvudii 40 jagi bálgá – "Skuvla lea dego guoppar mii lea šaddan ja viidon"

Rektor Eeva-Liisa Rasmus-Moilanen oaidná Sámi oahpahusguovddáža boahtte áiggi čuovgadin ja stabiilan.

SOGSAKK doalut 40 jagi Sámi oahpahusguovddáš
Lássegoađis muittašedje maŋŋebárgga sihke doložiid ja dálážiid. Govva: Inger-Elle Suoninen / Yle

Sámi oahpahusguovddáš ávvudii ikte maŋŋebárgga skuvlla 40 jagi bálgá.

Oahppolágádusa Anára doaibmabáikkis ledje beaivvi áigge rabasuvssat buohkaide. Lássegoađis guossit fas besse muittašit skuvlla guhkes historjjá. Sámi oahpahusguovddáža rektor Eeva-Liisa Rasmus-Moilanen illudii go nu máŋgasat serve skuvlla ávvudemiide.

– Dat beaivi leamašan hui suohtas ja somá. Lean leamašan nu ilus das, ahte nu olu olbmot leat boahtán ja oassálastán min ávvubeaivái, dadjá Rasmus-Moilanen.

Eeva-Liisa Rasmus-Moilanen
Sámi oahpahusguovddáža rektor Eeva-Liisa Rasmus-Moilanen. Govva: Jouni Aikio / Yle

Rektora lei váttis gávdnat

Sámi oahpahusguovddáš vuođđuduvvui jagis 1978. Vuođđudeami vuolggasadjin lei dat go sámeguovlu lea nu earálágan go Suoma eará guovllut iige sámiide ja sámeguovllu árbevirolaš ámmáhiid várás lean ollenge skuvlejupmi.

Oahpahusguovddáža rektorin doaimmai vuosttas jahkebeali Mihkku-Ilmár, Ilmari Laiti. Laiti muittaša, ahte buot váddáseamos lei gávdnat skuvlii fásta rektora.

– Skuvla lei guhká fásta rektora haga. De Valkeapää Lassi bođii Sámi Parlameantta čállin ja de falleheimmet dalán, ahte dál lea dilli dat ahte mis ii leat rektor, ahte dál de fertet álgit. Measta veagal bággiimet. Lihkus son beasai ohcat virgái ja son válljejuvvui, eaihan dat lean varra eará ohccitge. Dat gal lei sivdnádussan sámi duodjái ja sámi oahpahusguovddážii, dadjá Ilmari Laiti.

Ilmari Laiti, Mihku-Ilmár
Mihkku-Ilmár, Ilmari Laiti lea oahpahan duoji Sámi oahpahusguovddážis olles skuvlla historjjá áigge. Govva: Linda Tammela / Yle

Mihkku-Ilmár lea oahpahan sámi duoji Sámi oahpahusguovddážis álggu rájes gitta dassái go bázii ealáhahkii muhtin jagi áigi. Laiti lea čuvvon Sámi oahpahusguovddáža ovdáneami buriin mielain.

– Dat lea nu hearvái, dego guoppar mii lea šaddan ja viidon ja viidon. Oainnán, ahte skuvllas lea boahttevuohta. Okta fuolla lea goit dat, ahte seailugo skuvllas dat sámi duoji ossodat, mii leamašan dego skuvlla vuođđun álggu rájes, smiehtada Ilmari Laiti.

Ihmiselle koulutus kotiseudun mukaan
40 jagi ávvudoaluid oktavuođas almmustuvai maiddái girji Sámi oahpahusguovddáža historjjás. Govva: Inger-Elle Suoninen / Yle

"Buorre boahttevuohta"

Dálá dilis oahppolágádusas leat doaibmabáikkit Anára lassin Gápmasis ja Eanodagas. Avvila doaibmabáiki sirdásii oalát dán jagi Anárii, go ođđa doaibmalanjat gárvvásmuvve.

Skuvlla oahppofálaldagat leat viidon jagis jahkái. Sogsakk fállá dálá dilis oahpahusa sierra sámegielain, luonddufágain, duojis, sámi musihkas ja maiddái media-, turisma- ja biepmosurggiin. Fállon lea maiddái lagášdivššároahppu ja dihtoroahppu.

Rektor Eeva-Liisa Rasmus-Moilanen oaidná Sámi oahpahusguovddáža boahtte áiggi čuovgadin.

– Boahttevuohta lea hui buorre. Mis lea stabiila dilli dáppe skuvllas ja buorit bargit, olu studeanttat ja vejolašvuođat ovttasbargat earáiguin. Bargu gal joatkašuvvá das ovddos guvluige, dadjá Rasmus-Moilanen.

SOGSAKK doalut 40 jagi Sámi oahpahusguovddáš
Govva Sámi oahpahusguovddáža ávvudeamis 25.9. Govva: Inger-Elle Suoninen / Yle

Varrasamosat: Sápmi

Váldoođđasat

Varrasamosat