Sápmi |

Sámi oahpahusguovddážis skuvla álgá erenoamáš ortnegiiguin ja vuosttaš guokte vahku geavahit máskkaid

Oahpahus Sámi oahpahusguovddážis álgá odne disdaga 11.8.

Eeva-Liisa Rasmus-Moilanen
Sámi oahpahusguovddáža rektor Eeva-Liisa Rasmus-Moilanen. Govva: Tuomo Laiti / Yle

Sámi oahpahusguovddážis oahpahus álgá odne disdaga 11.8. earenoamáš ortnegiiguin amas koronavirus leavvat. Oahpahusguovddážis leat mearridan geavahit suodjemáskkaid guovtti vuosttaš skuvlavahku áigge, nappo 24.8. rádjái.

– Vuosttaš guokte skuvlavahku mii buohkat, sihke bargit ja studeanttat geavahit daid njálbme-njunnesujiid. Mii iskat sihkkarastit dan, ahte koronavirus ii beasa njoammut ovddasguvlui, muitala rektor Eeva-Liisa Rasmus-Moilanen.

Guokte vahku vástida karantenaáiggi, goas vejolaš dávdadáhpáhusat sávvamis gávdnojit, čállá oahpahusguovddáš dieđáhusastis.

Suodjemáskkaid ávžžuhit geavahit oahppolágádusa sajiin guovtti vahku maŋŋáge dárbbu mielde, ovdamearkka dihte diliin, goas ii leat vejolaš sihkkarastit doarvái guhkes gaskkaid dahje jos olmmoš gullá riskajovkui.

Oahppit sávve suodjemáskkaid geavaheami

Oahpahusguovddáža sajiide čoahkkanit oahppit ja bargoveahka miehtá Suoma ja olgoriikkain, ja ulbmilin leage eastadit vejolaš koronaepidemiija leavvama oahpahusguovddážis ja sámeguovllus viidásut.

– Jos dávda leavašii, oahppolágádusas gárttašeimmet sirdásit fas ollásit gáiddusoahpahussii. Lea dehálaš, ahte oahppit ja bargoveahka leat dorvvus njoammumiin, dadjá Eeva-Liisa Rasmus-Moilanen.

Ávžžuhus máskkaid geavaheapmái lea gárvvistuvvon oahppiid sávaldagas ja suodjemáskkaid leat skáhppon jo giđđat.

– Olbmot leat váldán bures vuostá máskaávžžuhusa, ja dainna mearrádusain leat viggan vástidit olbmuid fuolaide ja sávaldagaide, muitala Rasmus-Moilanen.

Máskkat leat dahkkon gággásis ja daid sáhttá bassat. Jos oahppi háliida máskka man geavahit dušše oktii, dan galgá ieš skáhppot.

Sog Sakk
Sámi oahpahusguovddáža doaibmabáiki Anáris. Govva: Ulla Isotalo

Sihkkarastit dorvvolašvuođa maiddái eará vugiiguin

Sámi oahpahusguovddážis leat linnjen maiddái eará dorvvolašvuođadoaimmain.

– Dieđusge vuosttaš dehálaš ášši lea, ahte giige ii boađe skuvlii dahje bargui jos lea buozus. Fysalaš kontávttaid galgá ráddjet nu olu go vejolaš, doallat dorvogaskkaid ja fuolahit giehtahygieniijas ja hygieniijas muđuige, čilge Rasmus-Moilanen makkár rávvagiiguin skuvllas sihkkarastet dorvvolašvuođa.

Ráddjendoaibman lea mearriduvvon, ahte oassi oahpahusas ollašuhtto ainge gáiddusin ja gáiddusbarggu jotket vejolašvuođaid mielde. Rasmus-Moilanen muitala maiddái, ahte sii eai váldde gussiid vuostá dán čavčča, eaige daga virgemátkkiid. Dat lea okta vuohki mo ráddjejit kontávttaid.

Sámi oahpahusguovddáža linnjemiid dorvodoaimmain gávnnat dáppe.

Guldal dás Eeva-Liisa Rasmus-Moilanen jearahallama. Jietna: Yle Areena.

Varrasamosat: Sápmi

Váldoođđasat

Varrasamosat

Muualla Yle.fi:ssä