Sápmi |

Sámi oahppomateriálaide miljovnna euro doarjja boahtte jahkái – nubbi oassi ruhtadeamis juhkkojuvvo dán jagi lassebušeahtas

Sámedikki oahppomateriálabargui mieđihuvvui stáhta boahtte jagi bušeahtaárvalusas bealle miljon euro ja nubbi bealle miljon euro boahtá dán jagi njealját lassebušeahtas. Dat lea guokte geardde eanet go ovddit jagiid áigge.

Saamelaiskäräjien ensimmäinen varapuheenjohtaja Anni Koivisto
Sámedikki várresátnejođiheaddji Anni Koivisto gearggai juo leat fuolas, ahte oahppomateriálaide ii mieđihuvvoše lasi ruhta. Son sávvá, ahte ruhtadeami fidne boahtte áiggis bissovažžan. Govva: Sara Kelemeny / Yle

Sámi oahppomateriálaid buvttadeapmái mieđihuvvo boahtte jahkái oktiibuot miljon euro stáhta bušeahtas.

Oahpahus- ja kulturministeriija lea evttohan stáhta bušehttii oktiibuot miljovnna euro doarjaga Sámediggái oahppomateriálaid buvttadeapmái. Ruhtadeapmi oahppomateriálaide juhkkojuvvo goittotge guovtti reaiddu bokte.

Sámedikki ja oahpahusráđđehusa ságastallamat leat čájehan, ahte oahppomateriálaid lasseruhtadeapmái lea juo guhká leamašan stuorra dárbu. Ruhtadeapmi lea jagi 2015 rájes leamašan 500 000 euro jagis.

– Dán várás lea dahkkon politihkalaš linnjen, ahte miljon euro lea boahtte jagi ruhtadeami dássi, muhto dán boahtit čoavdit bušeahttateknihkalaččat nu, ahte boahtte jagi bušeahttaevttohusas dat lea bealle miljoneuro ja nuppi oasi čáhkadit dán jagi lassebušeahttaevttohussii, čilge oahpahus- ja kulturministeriija ruhtadoallojođiheaddji Pasi Rentola.

Oahpahus- ja kulturministeriija ruhtadoallohoavda Pasi Rentola muitala, mo miljovnna euro ruhtadeamis leat mearridan. Guldal ollásit Yle Areenas. Jietna: Sara Kelemeny / Yle

OKM:n talousjohtaja Pasi Rentola
Oahpahus- ja kulturministeriija ruhtadoallohoavda Pasi Rentola muitala, ahte sámegielat oahppomateriálaid ovddideapmái lea oktasaš dáhttu. Govva: Kimmo P. / OKM

Sámediggi válddii ođđasa iluin vuostá, muhto fuolla boahtteáiggis loktanii

Geavatlaččat lassebušeahttaevttohus boahtá fápmui juovlamánus 2021. Dat dárkkuha dan, ahte boahtte jagi sámegielat oahppomateriálaide lea geavahusas dasa evttohuvvon miljon euro.

Sámedikki vuosttas ságajođiheaddji Anni Koivisto illuda ođđasis, muhto geahččá ruhtadeami dili ain guhkkeleappos.

– Dál dieđusge smiehttat sakka, ahte leago dárkkuhus leat bissovaš (ruhtadeapmi). Dat lea hui dehálaš, ahte mii bastit oahppomateriála barggu bargat boahttevuođas buorebut go dál, smiehtada Koivisto.

saamen kielen opiskelu
Sámegielat oahppomateriálat leat boarásnuvvan ja sámegielat materiála váilu olu. Govva: Anni-Saara Paltto / Yle

Máŋggalágan čielggadeamit leat čájehan, ahte sámegielat oahppomateriálaid dilli lea hui heittot, muittuha Anni Koivisto. Materiálat leat boarásnuvvan ja olu materiála váilu ollásit.

Sámedikkis illudit dál, go viimmát oahppomateriálabargguin beassat ovddosguvlui. Várreságajođiheaddji Anni Koivisto goittotge savvá, ahte bissovaš ruhtadeamis sáhtit ráđđádallat jođánit. Jietna: Sara Kelemeny / Yle

Dál ruhtadeapmi lea čielggas boahtte jahkái, muhto mo lea dilli dás ovddosguvlui, jearrá Koivisto.

– Gal mii dan jagi ruhtademiinge beassat álgui ja bastit dili buoridit, muhto dárbu bissovaš lasseruhtadeapmái lea duođalaš, dadjá Koivisto.

Bargu fásta ruhtadeami ovdii joatkašuvvá boahtte jagi. Oahpahus- ja kulturministeriija ruhtadoallohoavda jáhkká, ahte ášši gieđahallojuvvo boahtte giđa áigge.

– Dát lasáhus guoská dušše boahtte jagi ja jáhkán, ahte boahtte giđa ášši boahtá fas áigeguovdilin, go gieđahallat jagiid 2023–2026 bušeahtaid, dadjá Pasi Rentola.

Beaivvi ságaid ja Yle Ođđasiid Sámis sáhtát maid guldalit Yle Areenas.

Divvojuvvon 28.9.2021 diibmu 9:25: Anni Koivisto maŋimus sitáhtta divvojuvvon.

Varrasamosat: Sápmi

Váldoođđasat

Varrasamosat

Muualla Yle.fi:ssä