Sápmi |

Sámi siida gáibida Suoma ja Norgga rája rahpama Deanuleagi álbmogii: eai buorit ákkat doallat rájá gitta

Searvi lea sádden cealkámuša Suoma ja Norgga stáhtaministariide sihke guktuid riikkaid Sámedikkiid ságadoalliide.

Rajasulku Karigasniemi
Suoma ja Norgga rádjá giddejuvvui njukčamánus. Govva Gáregasnjárgga rádjerasttildanbáikkis cuoŋománu álggus. Govva: Vesa Toppari / Yle

Ohcejoga sámesearvi Sámi siida gáibida, ahte Suoma ja Norgga rádjá rahppojuvvo Deanuleagi ássiide.

Searvi gáibida, ahte Norgga ja Suoma eiseválddit váldet vuhtii Deanuleagi ássiid erenoamáš dili go árvvoštallet eastadandoaimmaid geahpideami ja vejolaš čavgema boahtte áiggis. Searvi lea maiddái hástán Sámedikkiid bargat ášši ovdii.

Sámi siida leage sádden cealkámušas Suoma stáhtaministtar Sanna Marinii ja Norgga stáhtaministtar Erna Solbergii, sihke guktuid riikkaid Sámedikkiid ságadoalliide, Aili Keskitaloi Norggas ja Tuomas Aslak Juusoi Suomas.

Suoma Sámedikki ságadoalli Tuomas Aslak Juuso muitala oanehaččat, ahte Sámedikkis leat bargamen áššiin ja sii dieđihit áššis go vejolaš.

Stáhtaministarat Sanna Marin ja Erna Solberg čoahkkimastiba odne digitálalaččat koronadili ja riikkaid ovttasbarggu birra, muitala Nrk Sápmi.

"Leatgo aivve vajáldahttán min?"

Sámi siida -searvvis oaivvildit ahte eai leat buorit ákkat doallat rájá gitta, ja danin gáibiditge rájá rahpama ja rabasin bissuma olbmuide, geat ellet Deanuleagis.

– Deanuleagis leat leamaš hui unnán koronanjoammumat. Deanus eai leamašan obanassiige, eaige Ohcejogasge. Norggas dál leahkkut rájá Dánmárkui, ja mii imaštallat manin eai hála Suoma birra, leatgo aivve vajáldahttán min, dadjá searvvi stivrralahttu Ellen Ravna.

Searvi oaivvilda, ahte koronavirusa eastadandoaimmat leat háddjen Deanuleagi álbmoga. Deanuleahki lea okta kulturguovlu gos lea oktasaš sámegiella, gos bearrašat ja fuolkkit ásset goappašiid beliid rája ja servodat- ja ealáhuseallinge gillá sakka go rádjá lea giddejuvvon, čállet Sámi siidda dieđáhusas.

– Mii leat hárjánan johtit dan rájá rastá. Mis leat fuolkkit ja bearaš nuppi bealde ja dál lea hui váttis máŋgga olbmos. Psyhkalaččat lossat, go eai beasa oaidnit lagaš fulkkiid dahje bearašlahtuid, čilge Ravna.

Maiddái Suoma davimus gielddat ja Lappi fitnodagat gáibidit rájáid rahpama. Sii gáibidit rájáid rahpama Norgii ja Ruŧŧii. Davvin Suoma, Ruoŧa ja Norgga rájáid goappáge bealde koronavirusdilli lea bisson ráfálažžan. Suoma beale Lappis maŋimus koronanjoammundáhpáhus leamaš measta guokte vahku dassái.

Ruoŧŧa ja Norga leat hui dehálaččat Ohcejoga, Anára, Eanodaga ja maid máddelis Muonio, Kolari, Pello, Ylitornio ja Durdnosa ássiide ja fitnodagaide, celket gielddat ja Lappi fitnodatdoallit. Rájáid gitta mannan jaskkodahtii rádjegávppi.

Yle Sápmi ii leat fáhten Suoma sisministtar Maria Ohisalo kommenteret rájáid rahpama.

Varrasamosat: Sápmi

Váldoođđasat

Varrasamosat

Muualla Yle.fi:ssä