Sápmi |

Sámi suohttasamos ságat fas juohke duorastaga –Sohkaršohkas ođđa biekkat bosodit

Sohkaršohkas álggaha ođđa jietnan Sáárákáisá Seurujärvi.

Sohkaršohkka
Sohkaršohkii gullet Sáárákáisá Seurujärvi, Xia Torikka ja Jon-Erik Näkkäläjärvi. Govva: Ville-Riiko Fofonoff / Yle

Yle Sámi nuoraidprográmma Sohkaršohkka álgá fas dán vahku duorastaga diibmu 17:30 spesiálasáddagiin. Sohkaršohkas joatkiba Jon-Erik Näkkäläjärvi ja Xia Torikka ja sudno lassin Sohkaršohkkii searvá 18-jahkásaš logahatoahppi Sáárákáisá Seurujärvi.

Sáárákáisá Seurujärvi
Sáárákáisá Seurujärvi illuda bargat Sohkaršohkas. Govva: Ville-Riiko Fofonoff / Yle

Seurujärvi vuordá iluin beassat bargat Sohkaršohkas.

– Lea hávski beassat bargat radios ja sávan, ahte sáddagiin šaddá somá. Mediasuorgi lea miellagiddevaš, dan bokte beasan leat olbmuid eallimis fárus, smiehtada Seurujärvi.

Sohkaršohkka bidjá návccaid sosiála media sisdollui

Sohkaršohkka sádde radiosáddaga juohke duorastaga diibmu 18:00–20:00, ja sátta boahtá nuppádassii bearjadagaid diibmu 18:30-20:30. Anja Kaarret joatká viisodagas ja rávvagiiddes juohkima Anja Duohtavuohta -prográmmaoasis, ja sutnje sáhttá sáddet maid gažaldagaid Sohkaršohka some-konttuid dahje Whatsapp bokte nummirii 040 1909 114.

Radiosáddaga lassin Sohkaršohkka áigu bidjat návccaid sosiála media sisdoalu buvttadeapmái. Sohkaršohkka almmustahttá čakčamánus válgavideoráiddu, mas Sohkaršohkka teste, man bures sámediggeválgaevttohasat máhttet jurddašit nuoraid perspektiivvas.

– Min gažadeamis bođii ovdan, ahte min guldaleaddjit sávvet eambo sisdoalu somei. Dan mii áigut dál ovddidišgoahtit, ja mis leatge olu plánat juo dál, sávan beassat muitalit daid birra eambo jođánamos lági mielde, muitala Xia Torikka.

Sohkaršohkka-gažadeapmái sáhttá vástidit dás.

Varrasamosat: Sápmi

Váldoođđasat

Varrasamosat

Muualla Yle.fi:ssä