Sápmi |

Sámiarkiiva áigu ohcat nuortalaččaid Gramota-arkiivva Unesco máilmmiárbelistui

Sámiarkiiva áigu ovdanbuktit Unesco Memory of the world -prográmmii nuortalaččaid 1600-logus čohkkejuvvon Gramota-arkiivva.

Kolttasaamelaisten 1600-luvulla kerätty Gramota -arkisto
1600-logus čohkkejuvvon Gramota -árkiiva heivešii bures Unesco prográmmii. Govva: Saa´mi Nue´tt ry

Sámiarkiiva áigu ovdanbuktit Unesco Memory of the world -prográmmii nuortalaččaid Gramota-arkiivva. Sámiarkiiva dutki Suvi Kivelä mielas 1600-logus čohkkejuvvon Gramota -arkiiva heivešii bures Unesco prográmmii.

- Dat Unesco máilmmi muitoprográmma, masa mii leat plánen ovdanbuktit Suomas nuortalašgili Gramota -arkiivva, lea namalassii dakkár mii lea dárkkuhuvvon girjerájuin ja arkiivvain leahkki čálalaš kulturárbin, muitala Suvi Kivelä.

Unesco máilmmi muitoprográmmas lea dán muttus Suomas dušše okta arkiiva, Nordenskiölda kárttat Helssega álbmotgirjerájus. Suvi Kivelä muitala, ahte Gramota-arkiivaprošeavttas šaddá viiddis prošeakta.

- Mannan miessemánus mis lei vuosttaš čoahkkin dán prošeavttas ja mii plániimet, ahte mii áigut ovttas bargat nuortalaš servodagain. Mii áigut boahtte lávvardaga ságastallat Čeavetjávrris nuortalaččaiguin Gramota mearkkašumi birra ja gosa dan jođihá.

Gramota lea ain amas nuorat buolvva nuortalaččaide

1600-logus čohkkejuvvon Gramota -arkiiva gávdnui sođiid áigge Suenjelis ja fievrreduvvui Suoma álbmotarkiivii. Dál Gramota gávdno Anára Sámiarkiivas. Dutki Suvi Kivelä mielas Gramota lea goittotge ain dovddameahttun nuorrabut nuortalaččaide ja su mielas livčče dehálaš, ahte arkiivva ealaskáhttet ođđasis.

- Unesco muitoprográmma lea min oktasaš ulbmil ja lea dehálaš, ahte mii beasset min ulbmilii ovttas. Dál lea maiddái dehálaš, ahte arkiivva ealaskáhttet ođđasis. Ovdamearkan lean ádden, ahte nuorabuidda Gramota -arkiivva lea goittotge ain menddo dovddameahttun.

Luohttámušalmmái: Arkiivafidnus stuorra mearkkašupmi nuortalaš kultuvrii

Nuortalaččaid luohttámušalmmái Veikko Feodoroff muitalii Njellima siidsååbbaris sotnabeaivve, ahte prošeakta ollašuhttet ovttas Sámiarkiivvain ja nuortalaš servošiin. Feodoroff mielde arkiivaprošeakta livčče stuorra mearkkašupmi nuortalaš kultuvrii.

- Unescohan doaibmá Ovttastuvvan našuvnnas ja dahká dehálaš barggu kultuvra ektui. Dákkár prográmmas livčče hui stuorra mearkkašupmi nuortalaččaide. Dat livčče gudni, jus nuortalaš Gramota -arkiiva beasašii Unesco máilmmelistui, muitala Feodoroff.

Nuortalaččaid siidsååbbaris lea ságastallandilálašvuohta Gramota -arkiivvas boahtte lávvardaga Čeavetjávrris.

Varrasamosat: Sápmi

Váldoođđasat

Varrasamosat

Muualla Yle.fi:ssä