Sápmi |

Sámiguovllus isket johtti nuoraidlanja, dat sáhttá mannat nuoraid lusa váikko gárddi lusa

Boahtte čavčča sámiguovllu nuoraide lea ođđa fálaldat. Nuoraidbargi galgá johttit viessobiillain doppe gos nuorat leat. Nuoraid mielas jurdda lea oalle buorre.

Nuorat oahpásmuvvamin Wautoi.
Nuorat oahpásmuvvamin Wautoi. Govva: Vesa Toppari / Yle

Dego dábálaš viessobiila, muhto teavsttat čájehit, ahte biila lea earálágan go viessobiila, sáhka lea namalassii johtti nuoraidlanjas.

Viessobiila galgá dohko, gos nuorat ieža leat. Boahtte čavčča dát biila sáhttá iđistit vaikko muhtin bigálusgárddi lusa, muitala Sámedikki nuoraidčálli KaisaTapiola-Länsman. Biila johtá sámeguovllus, nappo Ohcejoga, Anára, Eanodaga ja Soađegili Lappi bálgosa viidodagas.

Wauto lea Aseman lapset -searvvi johtti nuoraidlatnja.
Dát biila johttá boahtte čávčča miehtá sámiguovllu. Govva: Vesa Toppari / Yle

– Wauto lea Aseman lapset -searvvi johtti nuoraidlatnja. Mii leat fitnen dán luoikkasin dál čakčamánus juovlamánnui. Mii bargat ovttas sámeguovllu gielddaid nuoraidbargiin dasto jođihit dán biila birra sámeguovllu, čilge Tapiola-Länsman.

– Johtti nuoraidlatnja sáhttá mannat gosa beare, ovdamearka dihte bigálussii. Dainna biillain beassá dohko, gos dat nuorat leat, ahte nuorat eai dárbbaš boahtit muhtun dihto latnjii, dahje dihto báikái.

Nuoraidčálli Kaisa Tapiola-Länsman johtti nuoraidlánjas.
Nuoraidčálli Kaisa Tapiola-Länsman johtti nuoraidlánjas. Govva: Vesa Toppari / Yle

Nuoraid mielas Wauto lea buorre jurdda

Gávccátluohkkálaš Ibbá Lauhamaa lea oahpásmuvvamin Wautoi. Lauhamaa ieš ássá Eanodaga Bealdovuomis ja árvala, ahte gilážis leat logemađe nuora, iige doppe olus leat fállun nuoraide.

Lauhamaa mielas Wauto-biila lea buorre jurdda.

– Oalle earenomáš, go mun in leat gullan ovdal dás. Muhto dathan lea hui buorre, govvida Lauhamaa.

Ibbá Lauhamaa mielas johtti nuoraidlátnja lea miellagiddevaš jurdda.
Ibbá Lauhamaa mielas johtti nuoraidlátnja lea miellagiddevaš jurdda. Govva: Vesa Toppari / Yle

Ohcet sámegielat rávesolbmuid eaktodáhtolažžan biila fárrui

Aseman Lapset –searvvi Walkersdoaibma vuođđuduvvá dorvvolaš, eaktodáhtolaš rávesolbmuid nuoraide addin áigái. Biillas barget gielddaid ja searvegottiid nuoraidbargit ovttas eaktodáhtolaš bargiiguin.

Dál Sámedikki nuoraidráđđi ohcáge eaktodáhtolaččaid biila fárrui. Aseman Lapset ry skuvle eaktodáhtolaččaid ja eaktodáhtolaš bargin sáhttet ohcat buot badjel 18-jahkásaččat.

Ulbmilin lea oažžut fárrui davvisáme-, anáraš- ja nuortalašgiela hálli eaktodáhtolaččaid.

– Dan biillas johttá ámmátnuoraidbargi, geas lea dasto ovddasvástádus dan biillas. Eaktodáhtolačča bargun fas lea dasto doppe biilla fárus johttit ja hállat sámegiela. Mishan lea dieđusge dárkkuhus, ahte ovddidat dan sámegielat nuoraidbarggu, muitala Tapiola-Länsman.

Biila johttá čakčamánus juovlamánu lohppii, dárkilut áiggiid ja báikkiid Sámedikki nuoraidráđđi álmmuha maŋŋá.

Ibbá goit háliida fitnat dasto dán johtti nuoraidlanjas.

– Jus dáppe Anáris deaivá leat dalle go dat lea jođus dahje juoidá, de fitnat dalle Anára skihpáriiguin go sii máhttet sámegiela, arvala Lauhamaa.

Varrasamosat: Sápmi

Váldoođđasat

Varrasamosat

Muualla Yle.fi:ssä