Sápmi |

Sámiid duohtavuođa- ja soabadankommišuvnna lahttun evttohuvvojedje logi olbmo Sámediggái ja okta Nuortalaččaid siidačoahkkimii

Evttohusat bohte oktiibuot 16, muhto evttohuvvon olbmot ledje unnit. Namaid eai goittot vel muital almmolašvuhtii.

Veikko Feodoroff ja Tuomas Aslak Juuso
Nuortalaččaid ovdaolmmoš Veikko Feodoroff ja Sámedikki ságadoalli Tuomas Aslak Juuso. Govva: Vesa Toppari / Yle

Sámiid duohtavuođa- ja soabadankommišuvnna lahttun leat boahtán oktiibuot 16 evttohusa. Sámediggái dáin evttohusain bohte 14.

– Sáhka lea logi olbmos, geat leat evttohuvvon Sámediggái komissáran duohtavuođa- ja soabadankommišuvdnii, muitala Sámedikki ságadoalli Tuomas Aslak Juuso.

Sámedikkis eai vel muital evttohuvvon lahtuid namaid.

– Dál mii válmmaštallat ášši ja ráhkkanit. Ulbmilhan livččii dieđusge doallat daid álbmotdilálašvuođaid ja dál mii fertet vuordit dan, ahte dat koronadilli dainna lágiin rahpasa ahte mis lea vejolašvuohta ovdánit áššiin.

Álbmotgullandilálašvuođaid maŋŋel Sámedikki ollesčoahkkin galgá válljet Sámediggái evttohuvvon komissáraid, muitala Juuso.

Nuortalaččaid siidačoahkkimii evttohedje ovtta olbmo

Nuortalaččaid siidačoahkkima ovdaolmmoš Veikko Feodoroff muitala ahte, siidačoahkkimii leat boahtán guokte evttohusa, main guktuin lei seamma olmmoš evttohuvvon. Feodoroff ii muitalan evttohuvvon olbmo nama.

Nuortalaččaid siidačoahkkimii dahkkon evttohusat komissáran gieđahallojuvvojit Njellima, Keväjärvi, Njávdáma ja Čeavetjávrri guovlluid oktasaš čoahkkimis, muitala Feodoroff.

Sámediggi ja Nuortalaččaid siidačoahkkin jotke evttohanáiggi koronavirusa dagahan spiehkastatdili dihte. Evttohanáigi nogai 17.5.

Duohtavuođa- ja soabadankommišuvnna lahtut leat olbmot, geain lea viiddis luohttámuš sápmelaš ja suopmelaš servodagas. Lahtut galget leat sorjjasmeahttumat eaige oaččo ovddastit dan beali, mii sin lea evttohan dahje válljen.

Komissárain guokte válljejuvvojit stáhtaráđi evttohusas, guokte Sámedikki evttohusas ja okta Nuortalaččaid siidačoahkkima evttohusas.

Varrasamosat: Sápmi

Váldoođđasat

Varrasamosat

Muualla Yle.fi:ssä