Sápmi |

Sámiráđđi áigu álggahit guokte sierra sámi gálvomearkka

Sámiráđđi ovttas Sámedikkiiguin lea plánen ođđa gálvomearkkaid ja ođđa njuolggadusaid sámeduodjemerkii. Sámiráđi presideanta Áile Javo muitala, ahte ulbmilin livčče ásahit guokte sierra sámi gálvomearkka.

Sámis soitet boahtteáiggis leat guokte sierralágan sámi gálvomearkka.

Sámiráđis leamašan sullii jagi jođus prošeakta, man ulbmilin lea čielggadit sámi duodjemearkka váilevašvuođaid ja dárbbuid boahtteáigái. Sámiráđđi ja Sámedikkit čoahkkanedje mannan vahkus ságastallat áššis.

Guokte iešguđetlágan mearkka – veahkkin turisttaide

Sámiráđi presideanta Áile Javo muitala, ahte prošeavttas, man dutki Pia Nuorgam jođihii, evttohit ásahit guokte iešguđetlágan mearkka.

– Okta, mii lea árbevirolaš duodjái ja nubbi lea fas sámi ráhkaduvvon buktagiidda. Mii oinniimet ahte lea dárbu sihke nannet ja loktet iešdan árbevirolaš duoji, muhto maiddái muhtinláhkai suddjet ja leat mielde gilvaleamen dain faketuristabiergasiiguin.

Sámiráđi presideanta oaivvilda, ahte dat veahkeha maiddái turistaid, geat háliidet oastit eakti sámebuktaga.

– Mii beassat turisttaide čilget, ahte dát lea sápmelašráhkaduvvon buvtta. Dán ganneha oastit. Mii jáhkkit, ahte go turistat mátkkoštit guhkkin deike nu sis lea hállu oastit eakti, autentalaš gálvvu iige dan fakegálvvu.

Sámiráđi ságadoalli Áile Jávo Ovttastuvvan nášuvnnaid álgoálbmotforuma oktavuođas 2014.
Govva: Anna Sunna / SR Sámi Radio
– Váttisvuohta lea dat, ahte sii eai oainne erohusa, sii eai dieđe mii lea Kiinnás buvttaduvvon ja mii lea Sámis buvttaduvvon, nu ahte dan dáfus livčče nubbi mearka lea hui ávkkálaš, lohká Javo.

Áigot joatkit áššiin bargama

Sámiráđđi áigu bidjat návccaid duodjemearkkain bargamii, das go mánggat áššit leat ain eahpečielgasat, muitala Sámiráđi presideanta Áile Javo.

– De lea maiddái nu, ahte mii dárbbašit eanet áiggi gieđahallat ahte gii galggašii oamastit dakkár mearka, mo dan galgá ruhtadit, mo galgá hálddašit, ja mo sáhttá báikkálaš dásis mearridit ahte gii sáhttá geavahit dakkár mearka, nu dasa mii fertet joatkkaprošeavtta ásahit.

– Dat lea hui dehálaš, ahte čovdosat mat hutkojuvvojit leat maiddái duojáriid mielas buorit čovdosat, lohká Áile Javo.

Sámiráđđi sávvá beassat álggahit golbma jagi bistti joatkkaprošeavtta áššis. Guldal olles jearahallama dás.

Divvojuvvon 30.8.2016 dbm 15.05: Nubbi mearka lea oaivvilduvvon sámi dahje sápmelašráhkaduvvon buktagiidda, ii buktagiidda, mat leat buvttaduvvon Sámis, dego boastut vuos čáliimet.

Varrasamosat: Sápmi

Váldoođđasat

Varrasamosat

Muualla Yle.fi:ssä