Sápmi |

Sámiráđi čállingilvu geasuhii – ožžo badjel čuohte čállosa

Sámiráđđi muitala sámemánáid ja -nuoraid čállingilvvu bohtosiid ovdal juovllaid.

Enni Similä
Sámiráđi čállingilvu mánáide ja nuoraide geasuhii valjis oassálastiid. Okta gilvvu plánejeaddjin, Sámiráđi oahpahalli Enni Similä illuda sakka. Govva: Kirsti Helena Länsman / Yle

Sámiráđi dán čavčča čállingilvu geasuhii bures. Gilvui bohte mearreáiggis 16.9.–17.11.2019 badjel čuohte čállosa.

Čállingilvu leai oaivvilduvvon 6–30-jahkásaš sámemánáide ja -nuoraide. Čállosat bohtege buot golmma davviriikkas ja maiddái Ruošša beale Sámis.

Sámiráđi oahpahalli Enni Similä lei plánemin čállingilvvu. Son lea hui duhtavaš čállosiid mearrái.

– Nuppečuođe leat boahtán dat čállosat. Dál beivviid mielde, go mannat daid čađa, de oažžut dárkilis meari.

– Čállosat leat boahtán juohke riikkas, Suomas, Norggas, Ruoŧas ja Ruoššas. Mii leat hui ilus, gilvu lihkostuvai min mielas hui bures, Similä illuda.

Jahki 2019 leamaš álgoálbmogiid gielaid jahki. Sámiráđđi hálidii čállingilvvuin sihke čalmmustahttit temájagi ja maiddái hástit mánáid ja nuoraid čállit sámegillii.

Friddja fádda – buorit bálkkašumit

Sámiráđi čállingilvvus leai friddja fádda. Dákkár árbevirolaš čállingilvvut leat unnán sámegillii, ja danin Sámiráđis vurdetge gealdagasas beassat lohkat gilvočállosiid.

– Mis lea lávdegoddi, mii árvvoštallá čállosiid. Mis ii lean mihkkege temáid dahje rádji dasa, makkár čálus galgá leat. Lea hui miellagiddevaš oaidnit, makkár čállosat leat boahtán, dadjá Sámiráđi oahpahalli Enni Similä.

Čállingilvvus leat buorit bálkkašumit. Lunddolaččat buoremusat bálkkašuvvojit ja 40 bálkkašumi vel vuorbádit. Sámiráđđi juohká gilvvus bálkkašumiid oktiibuot 100 000 Norgga kruvnnu, sullii 10 000 euro ovddas.

Sámiráđđi muitala čállingilvvu bohtosiid ovdal juovllaid.

Divvojuvvon 19.11.2019 diibmu 12.35 diehtu bálkkašumiid mearis.

Varrasamosat: Sápmi

Váldoođđasat

Varrasamosat

Muualla Yle.fi:ssä