Sápmi |

Sámiráđđi ja SSN ordnejit oahpahalliprográmma, man olis beassá oahpásmuvvat EU-dási bargui

Prográmmii ohcet ovtta oahpahalli iešguđege Davviriikkas.

Enni Similä
Enni Similä mielde dán oahpahalliprográmma olis lea buorre vejolašvuohta fidnet bargovásáhusa riikkaidgaskasaš bargguin. Govva: Kirsti Helena Länsman / Yle

Sámiráđđi ja Suoma Sámi Nuorat leat ohcamin golbma oahpahalli Filling the EU-Sápmi knowledge gaps -prošektii. Oahpahalliprográmmii váldet ovtta ohcci Norggas, Ruoŧas ja Suomas. Prošeavtta ulbmilin lea ovddidit ja nanosmahttit Sámi ja EU gaskasaš ovttasbarggu.

Sámiráđi prošeaktabargi ja SSN ságajođiheaddji Enni Similä muitala, ahte dan barggu váras leage dehálaš skuvlet oahpahalliid, geain boahtá leat gelbbolašvuohta ja dáidu bargat EU-dási áššiiguin.

– Dán prošeavtta olis mii háliidat hukset dan gelbbolašvuođa Sámis. Eai leat nu ollugat geat basttet EU-áššiiguin bargat, mii háliidat ahte dat gelbbolašvuohta ja diehtu gávdno dáppe Sámis.

Riikkaidgaskasaš áššiid lassin oahpahalli beassá oahpásmuvvat Sámiráđi bargui sierra ossodagain. Oahpahallis lea maid alddis vejolašvuohta váikkuhit dasa, makkár áššiiguin namalassii son háliida bargat.

Dehálamos lea ahte sámenuorat fidnejit bargovásáhusa ja oidnet, makkár bargovejolašvuođat leat, oaivvilda Enni Similä.

– Oahpahalli ii leat čatnasan dušše beare dan prošektii, mii háliidat ahte oahpahallit besset oaidnit makkár eará barggut sáhttet leat. Mii eat hálit menddo olu ráddjet dan, lohká Similä.

Jietna: Xia Torikka

Ohcanáigi oahpahallin lea álgán dál ja joatkašuvvá borgemánu 15. beaivve rádjai. Oahpahalliáigodat álgá jagi 2021 álggus ja bistá jagi loahppabeallái. Oahpahallivuohta lea ollesáigásaš ja das máksojuvvo bálká. Loga lassedieđuid oahpahalliprográmmas Sámiráđi neahttasiidduin.

Varrasamosat: Sápmi

Váldoođđasat

Varrasamosat

Muualla Yle.fi:ssä