Sápmi |

Sámiráđđi lea almmustahttán čállingilvvu bohtosiid – guldal ovtta vuoitočállosiin dás!

Sámemánáid ja -nuoraid čállingilvui bohte oktiibuot 265 čállosa miehtá Sámi.

Arla Magga kasvokuva
Arla Magga faskkestii čállingilvvus stuorámus ruhtavuoittu, oktiibuot 10 000 Norgga ruvnno. Govva: Vesa Toppari / Yle

Sámiráđi lágidan mánáid ja nuoraid čállingilvu geasuhii valjit oassálastiid. Gilvui bohte mearreáiggis 16.9.–17.11.2019 oktiibuot 265 čállosa.

Čállingilvu lei oaivvilduvvon 6–30-jahkásaš sámemánáide ja -nuoraide. Čállosat bohte buot golmma davviriikkas ja maiddái Ruošša beale Sámis.

Sámiráđđi jugii gilvvus bálkkašumiid oktiibuot 100 000 Norgga ruvnno ovddas, mii lea sullii 10 000 euro.

Sámiráđi čállingilvvus lei friddja fáddá ja gilvu lei juhkkojuvvon sierra ahkeluohkáide. Árvvoštallit eai oaidnán čálliid namaid, go árvvoštalle čállosiid.

“Vau, ledjen gusto oalle čeahppi!”

23–30-jahkásaččaid gilvoluohká vuittii Arla Magga, guhte lea Anáris eret, muhto orru dán áigge Oulus. Noveallain Veaiga Magga faskkestii čállingilvvus stuorámus ruhtavuoittu, oktiibuot 10 000 Norgga ruvnno.

Maggai vuoitu bođii vuorddekeahttá.

– Vuos mun hirpmahuvven ja de hirpmahuvven vel eanet. Ledjen loahpas aivve jierásmuvvan. Muhto gal mun de smihtten, ahte vau, ledjen oalle čeahppi gusto, boagusta Arla Magga.

Magga muitala, ahte áiggui álggos searvat gilvui hervošančállosiin, koseriijain. Čálus šattai goit loahpas eanet duođaleabbon.

– Das leat máŋga iešguđet dási ja dat lea oalle váivves novealla ja muitalus. Mu mielas das lea muhtin veardde maiddái doaivva. Lohkki sáhttá de ieš maid suokkardallat dieid dásiid, ii vealttakeahttá fuomáš visot daid seammás, muhto jus lohká máŋgii de sáhttá gávdnat lasi, muitala Magga.

Magga bargá olu sámegielain iežas barggu olis. Astoáiggis son goit ii olus čále, vaikko miella gal livččii. Magga goit jáhkká, ahte čállingilvu lea addán sutnje eanet roahkkatvuođa.

– Mun smihtten dalle ovdal go mun oassálasten, ahte duostango ja gillengo mun oassálastit go orui, ahte mun in nagot čállit lohppii dan iežan novealla. Mu mielas orui, ahte jus mun in dál čále, de goas mun de čálán. Jus dat dál rahpasii de juoga čuolbma ja mun čálligoađán eanet, smiehtada Arla Magga.

Guldal Arla Magga novealla “Veaiga” dás.

Sámiráđđi soaitá almmustahttit čállosiid boahtteáiggis

Čállingilvvuin Sámiráđđi háliidii čalmmustahttit sihke álgoálbmogiid gielaid temájagi ja maiddái hástalit mánáid ja nuoraid čállit sámegillii.

Sámiráđi oahpahalli Enni Similä leamašan plánemin čállingilvvu. Similä mielas gilvu lihkostuvai earenomáš bures, go nu máŋggas serve dasa.

– In kánske ieš livčče máhttán vuordit ná olu čállosiid. Mis ledje goit hui geasuheaddji bálkkašumit, de dat soittii váikkuhit dasa, árvala Similä.

Enni Similä
Enni Similä ii vel máhte dadjat, lágidago Sámiráđđi seammasullasaš čállingilvvuid boahttevuođas. Govva: Kirsti Helena Länsman / Yle

Similä muitala, ahte čállingilvui bohte olu iešguđetlágan čállosat dego divttat, noveallat, muitalusat ja máidnasat.

– Lea hui olu variašuvdna vuoitiin. Somá oaidnit, ahte ná olu mánát ja nuorat ledje háliidan čállit midjiide sámegillii, rámiida Similä.

Similä muitala, ahte Sámiráđđi soaitá almmustahttit čállingilvvu vuoitočállosiid boahttevuođas vai olbmot besset lohkat daid.

Varrasamosat: Sápmi

Váldoođđasat

Varrasamosat

Muualla Yle.fi:ssä