Sápmi |

Sámiráđđi ođasmahttá Sámi Duodjemearkka – " Ii doaimma dálá dilis nu go galggašii"

Ulbmil bargguin lea suddjet duoji ja sámi designa, ja maiddái buoridit duoji ja sámi designa gálvomearkan.

Sami Duodjemearka
Govva: Sámiráđđi

Sámiráđđi lea bargamin Sámi Duodjemearkka ođasmahttimiin. Ulbmil bargguin lea suddjet duoji ja sámi designa, ja maiddái buoridit duoji ja sámi designa gálvomearkan.

Sámiráđđi ásahii Sámi Duodjemearkka 1980-logus sámi duoji gálvomearkan. Ulbmil lei earret eará suodjalit sámi duoji áddestallama ja soahpameahttun gilvaleami vuostá ja čujuhit oastiide, ahte gálvvu lea duddjon sápmelaš.

– Sámiráđđi oaivvilda, ahte Sámi Duodjemearka ii doaimma dálá dilis nu go galggašii. Ovttas duodjeorganisašuvnnaiguin ja Sámedikkiiguin mii háliidat hukset buoret struktuvrra mearkka birra, sihke juridihkalaččat ja gávppálaččat, dadjá prošeaktajođiheaddji Ellen Berit Dalbakk.

Ellen Berit Dalbakk
Sámi Duodjemearkka prošeaktajođiheaddji Ellen Berit Dalbakk lea ieš maid duojár. Govva: Carl-Johan Utsi

Árvolassáneapmi lea buorre sámi servodahkii

Prošeakta lea dál ovdaprošeaktan ja Sámiráđđi gulahallá duodjebirrasiiguin ja organisašuvnnaiguin gávnnahan dihte movt galgá joatkit bargguin.

– Oassi barggus dán dásis lea maiddái buoridit duoji gálvomearkan. Ulbmil lea earret eará, ahte turisttat geat bohtet Sápmái galget diehtit, ahte mearka gávdno juo ovdal sii bohtet; sii galget háliidit oastit duoji ja sámi designa main lea Sámi Duodjemearka. Sámiráđđi háliida doarjut árvolassáneami sámi servodaga buorrin, dadjá Dalbakk.

Bovde duodjeorganisašuvnnaid ovttasbargui

Oassin barggus Sámiráđđi lágida gulahallanseminára “Mo suddjet duoji?” Anáris miessemánu 22. beaivvi. Dalbakk jáhkká, ahte semináras bohtet ovdan dehálaš jurdagat Sámi Duodjemearkka ovddideami ektui.

– Midjiide lea dehálaš oažžut oaiviliid ja oainnuid sámi servodagas dán barggus. Mii háliidat gulahallat duodjeorganisašuvnnaiguin, duojáriiguin ja eará berošteddjiiguin. Mii fertet ovttasbargat nu, ahte Sámi Duodjemearka šaddá ávkin sámi servodahkii, dadjá Sámi Duodjemearka prošeaktajođiheaddji Ellen Berit Dalbakk.

Sámiráđi bargu ođasmahttit Sámi Duodjemearkka lea ožžon ruhtadoarjaga EU-prográmmas “Northern Periphery and Arctic Programme”. Sámiráđđi lea juo čađahan ovtta prošeavtta Sámi Duodjemearkka revitaliserema ektui jagiin 2015-2016 ja dat oaččui ruhtadoarjaga Norgga Sámedikkis.

Ellen Berit Dalbakk lea mielde vuossárgga Dearvva-sáddagis. Guldal Dearvva-sáddaga diibmu 15.00 rájes Yle Sámi kanálas.

Varrasamosat: Sápmi

Váldoođđasat

Bivnnuhamosat

Varrasamosat

Muualla Yle.fi:ssä