Sápmi |

"Sámis árbevieruin lea servodatlaš mearkkašupmi" – Näkkäläjärvi loktii sámi perspektiivva ovdan Meidän Festivaalis

Yle Sámi ovddeš hoavda Pirita Näkkäläjärvi rabai sotnabeaivve Meidän Festivaali -dáhpáhusa eamiálbmot-temábeaivvi. Son háliida iežas sáhkavuoruin boktit olbmuid miellagittu sámeáššiide.

Pirita Näkkäläjärvi
Yle Sámi ovddeš hoavda Pirita Näkkäläjärvi hálai Meidän Festivaalis sotnabeaivve ja vuossárgga. Govva: Maarit Kytöharju / Meidän Festivaali

Järvenpääs, Mátta-Suomas álggii sotnabeaivve Meidän Festivaali -nammašas dáhpáhus (sá. Min festivála). Dáhpáhusa valdotemán lea dán jagi jienastanvuoigatvuohta ja eará temán earet eará eamiálbmogat ja árbevierut.

Festiválas leat mielde maiddái sápmelaš nissonat. Anáraš dánsu Auri Ahola lea ráhkadan dánsunkoreografiijá juoigi Ingá-Máret Gaup-Juuso luđiide ja soai ovdanbuvttiiga ovttasbarggu festiválas sotnabeaivve. Dan lassin okta festivála hálliin lea Yle Sámi ovddeš hoavda Pirita Näkkäläjärvi.

"Hálidan deattuhit, mo mii oaidnit iežamet"

Pirita Näkkäläjärvi hálai sotnabeaivve festivála eamiálbmotbeaivvis dan birra, ahte sápmelaččat leat iežas álbmot, vaikko orrotge Suomas.

Näkkäläjärvi válljii hállat fáttá birra danin, go sámit eai leat jur oidnosis Suoma servodagas. Son oaivvilda, ahte suopmelaččain ii oppalohkáige oro leamen áddejupmi das, mii sápmelašvuohta dahje eamiálbmot lea.

– Suopmelaččain lea dávjá dakkár jurddašeapmi, ahte sápmelašvuohta lea oassi suopmelašvuođa ja mun háliidan deattuhit dan, ahte mo mii oaidnit iežamet álbmogin ja eamiálbmogin, Näkkäläjärvi muitala.

"Mii fertet ieža fuolahit árbevieruineamet"

Ikte vuossárgga Pirita Näkkäläjärvi doaimmai ovttas dáiddár Paula Susitaipalein guovtti konseartta eamidin ja hálai árbevierrotemá birra.

Näkkäläjärvi háliidii loktet ságastallamii Suoma ja Sámi servodaga árbevieruid erohusa.

– Mun iežan bealis háliidan čilget gehččiide ja guldaleddjiide dan, ahte sápmelaš servodagas árbevieruin lea servodatlaš mearkkašupmi. Hálidan maiddái muitalit iežan oaivila das, ahte mu mielas suopmelaš ja Suoma servodagas árbevieruin ii leat iešalddes šat mangelágan mearkkašupmi, muitala Näkkäläjärvi.

Pirita Näkkäläjärvi oaivvilda, ahte dálá máilmmis sámit ieža fertejit fuolahit, ahte sápmelaš árbevierut seilot.

– Dat lea hui stuorra erohus, min servodagas ja árgabeaivvishan árbevierut leat hui dehálaččat. Go mis ii leat stáhta, de mii eat sáhte vuordit, ahte stáhta fuolaha mis ja min kultuvrra seailumis. Danin mii fuolahit ieža, ahte min árbevierut seilot, ja mii čájehit maiddái gullevašvuođa ja min báikki máilmmis. Mii gávdnot ain min árbevieruid bokte, Näkkäläjärvi deattuha.

Pirita Näkkäläjärvi lei mielde vuossárgga Buorre iđit Sápmi -sáddagis. Guldal sáddaga dáppe.

Rievdaduvvon 25.7. diibmu 9:33: Bajilčállaga sitáhtta divvojuvvon vástidit jearahallama.

Varrasamosat: Sápmi

Váldoođđasat

Varrasamosat

Muualla Yle.fi:ssä