Sápmi |

Sámis boahkuhit fas influenssa vuostá – ávžžuhit váldit ieš oktavuođa, jos lea čakčat báhcán boahkuid haga

Sámegielddain muitalit, ahte sii leat ožžon lasi influensaboahkuid ja galggašedje bastit boahkuhit buot riskajoavkkuide gullevaš olbmuid.

Käyttämättömiä injektioneuloja korissa.
Dearvvašvuođa- ja buresveadjinlágádus ávžžuhii čakčat riskajoavkkuide gullevaš olbmuid váldit influenssaboahkuid eandalii koronaepidemiija áigge. Govva: Jarkko Riikonen / Yle

Sámegielddain boahkuhit fas influenssa vuostá, go leat ožžon lasi boahkuid.

Koronavirusa dagahan stuorra jearalmasa dihte influensaboahkut nohke čakčadálvit máŋgga sajis miehtá Suoma ja sámeguovllu.

Maid Anára gielddas gárte čakčat ráddjet boahkuheami ja šluhttet sohppojuvvon boahkuhanáiggiid olbmuin, go boahkut nohke. Dál dilli lea buoret, go sii leat aiddo ožžon lasi boahkuid Lappi guovddášbuohcceviesu apotehkas.

Anára gieldda boahkuhanoktavuohtaolmmoš, dearvvašvuođadivššár Jaana Tarvainen ávžžuha dál váldit oktavuođa dearvvašvuođaguovddážii, jos ii leat vel ožžon influensaboahkuid.

– Mis leat ain sullii 40 boahku, ja várra boahtte vahkus lea dárkkuhus boahkuhit maiddái Anára girkosiiddas, Tarvainen muitala.

Dearvvašvuođa- ja buresveadjinlágádus ávžžuhii čakčat riskajoavkkuide gullevaš olbmuid váldit influensaboahkuid eandalii koronaepidemiija áigge, amaset buohccát seamma áigge koronavirusii ja influensii. Boahkuheapmi lea nuvttá riskajovkui gullevaš olbmuide.

Influenssa riskajoavkkuide gullet earret eará boarrásat ja olbmot, geain lea dihtolágan guhkesáigásaš buohccivuohta.

Sámis dilli lea dál buorre influenssaboahkuheami ektui

Maiddái Soađegili gieldda jođiheaddji divššár Eija Kivekäs ávžžuha váldit oktavuođa gieldda dearvvašvuođafuolahussii, jos dárbbaša influensaboahkuid. Boahkuheami sáhttá soahpat maiddái nu, ahte boahkuhit eará ášši dikšuma olis vuostáváldimis. Vuosttamužžan boahkuhit riskajoavkkuid, muhto dárbbus sáhttá ságastallat, jos lea ovdamearkka dihtii olu dahkamušas riskajoavkkuide gullevaš olbmuiguin.

Ohcejoga gielddas ožžo juovlavahku áigge lasi boahkuid Lappi guovddášbuohcceviesus, ja leat dál bastán boahkuhit mealgadit buot riskajoavkkuid olbmuid, geat leat dan hálidan, buohččedivššár Iiris Laitila muitala.

Dearvvašvuođadivššár Paula Keski-Kujala muitala, ahte Giehtaruohttasis lea dál buorre dilli influensaboahkuhemiid ektui. Muoná-Eanodaga jođiheaddji doavttir Teemu Taulavuori dadjá, ahte maiddái Heahtá guovllus leat boahkuhan doarvái ollu iige influensadilli oro heittot, vaikko ođđa boahkut eai leat su dieđuid mielde boahtán.

Koronadili dihte áiggi boahkuheapmái galgá várret ovddalgihtii. Gielddaid neahttasiidduin gávdná lassedieđuid iešguđet gieldda influenssaboahkuheamis ja áiggi várremis.

Beaiváduvvon 8.1.2021 dii 13:25: Lasihuvvon Muoná-Eanodaga jođiheaddji doaktára Teemu Taulavuori kommeanta.

Varrasamosat: Sápmi

Váldoođđasat

Varrasamosat

Muualla Yle.fi:ssä