Sápmi |

Sámis heajos vuodjinsiivu suhkkes borgga dihte – "Geasserieggáiguin ii gánnet johtit"

Sámeguovllus gánneha gaskavahku dárkket smiehttat, vuolgágo vuodjit geasserieggáiguin, rávve gohcci buollinmeašttir.

Video: Inari 8.5.2019
Anára márkanis lei suhkkes muohtti gaskavahkkoiđit 8.5.2019. Mikkâl Morottaja / Yle.

Johtolatguovddáš váruha heajos vuodjinsiivvus otne gaskavahku miehtá davimus Suoma.

Johtolatguovddáža váruhuskárta čájeha, ahte vuodjinsiivu lea erenoamáš fuotni sámeguovllus, Eanodaga, Anára ja Ohcejoga guovlluin.

Vuodjinsiivu lea heittot muohtti, šlahtti ja šoavlli dihte. Lappi gádjunlágádusa gohcci buollinmeašttir Pekka Väliheikki Muonás váruha olbmuid vuodjimis otne geasserieggáiguin.

– Mis leamašan otne máŋggat gádjunbarggut. Dán rádjai leat ovttaskas persovdnabiillat vuodján doaresbeallái iige mihkkige vearrát leat lihkus vel geavvan.

– Muhto jos lea bággu otne vuolgit gosanu, de ávžžuhan várret dasa áiggi ja vuodjit hui gulul. Jos biillas leat geasserieggát, gánneha gal smiehttat daid lonuheami dálverieggáide dahje sirdit vuolgima ihttážii. Jos ii leat otne bággu vuodjit guhkes mátkkiid, de in ávžžut dan dahkat, Väliheikki muitala.

Dálkedieđalágádus einnosta muohtti dušše gaskavahkkui, duorastaga galggašii jo firtet.

Varrasamosat: Sápmi

Váldoođđasat

Varrasamosat

Muualla Yle.fi:ssä