Sápmi

Sámis imaštallet, mas lea sáhka virtuálalaš viehkandáhpáhusas – lágideaddjit šállošit, ahte eai leat máhttán gulahallat sápmelaččaiguin doarvái bures

Sámi Finland Run mitali.
Viehkandáhpáhussii oassálastiid giktalit oastit earret eará dákkár medálja. Govva: VirtualRunners World Wide

Viehkandáhpáhusa lágideaddji Virtual Runners -organisašuvnnas muitalit, ahte leat čuvvon kritihka maid leat ožžon sosiála media bokte ja šállošit, ahte ášši lea boktán ságastallama.

Sámis leat imaštallan, mas lea sáhka Virtual Runners -viehkandáhpáhusas, mas máidnot virtuálalaš viehkama sápmelaččaiguin ja vuvdet Sámi Finland Run -báiddiid. Dáhpáhusa sosiála media lávddiin leat olbmot jearran earet earáid, ahte mo sápmelaččat leat mielde dán dáhpáhusas ja mo sápmelaččat ávkašuvvet das.

Ovdamearkka dihtii Suoma Sámedikki ságadoalli Tuomas Aslak Juuso lea kommenteren, ahte dáhpáhus orru eahpidahtti. Yle ii fáhten Juuso kommenteret ášši. Sámiráđi várrepresideanta Áslat Holmberg dadjá Ávvir-aviisii, ahte su mielas ii lea riekta go geavahit sámi nama go lágidit Sámi Finland Run -gilvvu.

– Mun oainnán sis ii leat riekti dán lágidit sámi namas. Ii leat oahpis searvi mii dan lágida. Ii goit mu dieđus leat ovttasbargu sámi servviiguin dahje ásahusaiguin, iige leat oahpesolmmoš, gean sii namuhit “running ambassador and representative of the Sàmi from Finland”, čilge Holmberg.

Holmberg čuoččuha aviissas, ahte Sámi iešmearrideapmái gullá hálddašit sámi symbolaid ja nama.

Gaiddusoahpahusfidnu davvisamegiela oahpaheaddji Aslak Holmberg
Vieris searvvit eai galggašii sáhttit sámi nama ja symbolaid bokte dinet ruđaid, čuoččuha Sámiráđi várrepresideanta Áslat Holmberg Ávvir-aviissas. Govva: Linnea Rasmus / Yle

Organisašuvnnas šállošit ášši boktán ságastallama

Viehkandáhpáhusa duohken lea Virtual Runners -nammasaš organisašuvdna. Siiddus vuovdalit viehkandáhpáhusaid miehtá máilmmi.

Organisašuvnnas muitalit, ahte sii leat čuvvon kritihka maid leat ožžon sosiála media bokte. Raphael Muschallan šálloša, ahte ášši lea boktán dákkár ságastallama. Son muitala, ahte sin organisašuvnnas eai láve muitalit olu ovddalgihtii, dárkilut diehtu dáhpáhusaid boahtá justa vehá ovdal daid.

– Mii áddet goit manin dát ságastahttá, eat leat várra máhttán gulahallat sápmelaččaiguin doarvái. Dárkkuhussan ii goit leat ávkašuvvat sis, muhto baicce veahkehit ja čalmmustahttit sin kultuvrra, dadjá Muschallan.

Raphael Muschallan muitala, ahte dás duohko sii áigot buorebut gulahallat servošiiguin ja sávvá, ahte boahtte vahkus sis livčče eanet maid muitalit Sámi Finland Run -dáhpáhusas.

– Dát lei vuosttas geardi, go olbmot ságastišgohte dán láhkai. Midjiide lea dehálaš oahppat ja áddet mo gulahallat buorebut iešguđet oassebeliiguin, joatká Muschallan.

Virtual Runners -organisašuvdna lea lágidan viehkandáhpáhusaid jo ovdal koronapandemiija miehtá máilmmi. Dáhpáhusa olis leat skeŋken oasi ruhtaboađus maiddái buorredagolašvuhtii.

Muschahallan muitala, ahte sii leat čielggadan makkár sámedoaibmiid várás sii sáhtášedje skeŋket ruđa. Dárkkuhussan lea, ahte dat manašii mánáide ja nuoraide sihke vejolaččat boazodoalu várás.

Organisašuvnna Suoma ambassadevra hálida čalmmustahttit sápmelaččaid dili

Sámi Finland Run -virtuálaviehkama ambassadevran doaibmá Suomas Alina Termäs. Son muitala, ahte doaibmá eaktodáhtolažžan iige oaččo bálkká doaimmas.

– Mun lean dego dakkár ovdaviehkki. Dat, gii viehká mu áiggi vuollel, sáhttá oasálastit vuorbádeapmái ja vuoitit bálkkašumiid, muitala Termäs.

Termäs lea movttáskan viehkanvaláštallamii jo mánnávuođa rájes. Koronapandemiija áigge son lea gávdnan Virtulal runners -organisašuvnna ja vuolgán mielde dan doibmii.

Alina Termäs
Alina Termäs lea viehkan Virtual Runners -organisašuvnna bokte iežas vuosttas maratona ja movttáskii álgit ambassadevran organisašuvdnii. Govva: Alina Termäs

Sámi Finland Run -virtuálaviehkama lágidit miessemánu loahpas. Dán dáhpáhusa oasil eai leat vel mearridan gosa skeŋkejit ruđa. Organisašuvdna lea ovdal skeŋken ruđa ovdamearkan nuoraid lohkandáiddu várás ja borasdávdabuohcciide ja leukemiijadutkamuššii.

Persovnnalaččat Termäs lea hálidan vuolgit dása fárrui vai fidnešii oidnosii sápmelaččaid dálá dili. Sutnje lea dehálaš ovdanbuktit sápmelaččaid eamiálbmogin ja sin rivttiid.

– Hálidan čalmmustahttit, ahte mis leat iežamet rievttit ja daid leat duolbman jo guhká. Livčče dehálaš fuomášit, ahte ii leat riekta loggut min eatnamiid ruvkkiid dihte, vaikko doppe leatge luondduvárit, dat leat Sámieanan, dadjá Termäs.

Yle Ođđasiid Sámis ja Beaivvi ságaid sáhtát maid guldalit Yle Areenas.

Varrasamosat

Muualla Yle.fi:ssä