Sápmi |

Sámis vuolgá doarjjajoavku guottihit Soljju – Risteadni ja oarpmealle vuordá sudno beassat viidásit

Ohcejohkalaš Ulla Pirttijärvi-Länsman ja Hildá Länsman lávkeba lávvardaga lávddi ala Suoma Eurovision-rátkimiin. Sámis vulget logemat olbmo doarjut Soljju báikki ala.

Outi Länsman ja Solju-guottihanšilttat
Áŋŋellaš Outi Länsman lea Ulla oarpmealle ja Hilddá risteadni. Doarjjajoavku lea buđaldan gilvvu váras solju-guottihanšilttaid. Govva: Outi Länsman / Maiju Saijets

Ohcejohkalaš eadni ja nieida, Ulla Pirttijärvi-Länsman ja Hildá Länsman gilvaleaba lávvardaga Suoma Eurovision-rátkimiin, UMK-gilvvus.

Jearaldat lea UMK-gilvvu maŋimuš oassegilvvus, mas válljejit golbma artistta ain ovddosguvlui boahtte vahku finálii.

Risteadni ja oarpmealli vuordá Soljju beassat viidásit

Sámis vuolgá logemat olbmo doarjjajoavku čuovvut gilvvu báikki ala Helssega Pasilai.

Okta sis lea Ulla oarpmealle ja Hilddá risteadni, áŋŋellaš Outi Länsman. Sutnje dát dilálašvuohta lea stuorra gudni.

– Lea stuorra gudni beassat čuovvut báikki ala gilvvuid. Doaivvu mielde bastit leat maiddái doarjjan Ulla ja Hilddá -guoktái.

Doarjjajoavku lea buđaldan gilvvu váras solju-guottihanšilttaid. Länsman jáhkká Soljju birget gilvvus.

– Vuordit dieđusge, ahte beassaba viidásit gilvvus. Gal mus leat juo čeahpes oarpmealle ja ristnieida!, Länsman vel rápmosta.

UMK-oassefinála lea 21.2.2014 diibmu 21.00 Yle TV2:žis. Dán 3. oassegilvvu guđa gilvvaleaddjis besset golmmas viidáseabbot UMK-gilvvu finálii. Finálas gilvalit ovcci joavkku.

Varrasamosat: Sápmi

Váldoođđasat

Varrasamosat

Muualla Yle.fi:ssä