Sápmi |

Sámis vuolgimin moaddelogi čuoigi ja guokte spábbačiekčanjoavkku AWG-gilvvuide

Arctic Winter Games lágiduvvojit Kanáda Whitehorse-gávpogis njukčamánu beallemuttus jagis 2020. 

Emili Portti beassá AWG-gilvvuide
Anárlaš Emili Portti oasálastá čuoigamii Kanádas. Dás son čuoigá AWG-gilvvuin jagis 2018 Hay River ja Fort Smith giliin Kanádas. Govva: Charles Petterson, Sámiid Válaštallan Lihttu

Sámis leat vuolgimin Árktalaš dálveriemuide dahjege Arctic Winter Games -gilvvuide guokte spábbačiekčanjoavkku ja 24 čuoigi.

Sápmi searvá vuosttas geardde Árktalaš dálveriemuid (AWG) spábbačiekčamii gándajoavkkuin. Dat dáhpáhuvvá danin, go Ruonáeatnama 16-jahkásaččaid gándajoavku geassádii, muitala NRK Sápmi. Sámis gilvvuide searvá maiddái vuollel 18-jahkásaš nieiddaid spábbačiekčanjoavku.

– Suoma beale Sámis guokte čuoigi oassálastiba dálveriemuide nappo Emili Portti ja Pekka Tervaniemi, dadjá Anára sámesearvvi ságadoalli Aslak Paltto.

Ovddit geardde Anára sámisearvvis njeallje čuoigi AWG-gilvvuin

Ovddit geardde Árktalaš dálveriemut lágiduvvojedje jagis 2018.

Sámi joavkkus ledje dalle oktiibuot 36 valáštalli (sis. várrelahtut), geat gilvaledje čuoigamis ja spábbačiekčamis. Gilvvut ordnejuvvojedje dalle Hay River ja Fort Smith giliin Kanádas.

Sámi joavkku ovddastedje Suoma beale nuorain čuoigit Emili Portti, Hillá Portti, Vilma Rytky sihke várresajis Antti-Olavi Rytky. Sii gullet Anára Sámisearvái.

Árktalaš dálveriemut ordnejuvvojit 15.–21.3.2020 Kanáda Whitehorse-gávpogis. Gilvvut leat árktalaš guovllu nuoraide dárkkuhuvvo valáštallan- ja kulturdoalut, mat lágiduvvojit juohke nubbi jagi.

Varrasamosat: Sápmi

Váldoođđasat

Varrasamosat

Muualla Yle.fi:ssä